ខេត្តស្វាយរៀង៖ ទំនិញខូចគុណភាពចំនួន ៥មុខ ក្នុងនោះមាន៖ទឹកត្រីកោះកុង ,នំធុង ,តែកញ្ចប់ ,ថ្នាំដុសធ្មេញ និងប្រេងកូឡា ត្រូវបានអាជីវករដាក់លក់នៅក្នុងផ្សារកំពង់ត្រាច ស្រុករមាសហែក ត្រូវកម្លាំងមន្ត្រីសាខាការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំខេត្តស្វាយរៀង រកឃើញ ខូចគុណភាព កាលពីព្រឹកថ្ងៃទី១៦ ខែមិថុនា ឆ្នាំ២០២០ ។

មន្ត្រីសាខាការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំខេត្តស្វាយរៀង បានឲ្យដឹងថា សកម្មភាពចុះត្រួតពិនិត្យនៅផ្សារកំពង់ត្រាចនេះ មន្ត្រីជំនាញបានពិនិត្យគ្រឿងឧបភោគបរិភោគ នៅតាមស្តង់ក្នុងផ្សារតាំងលក់ទំនិញ និងបានប្រើប្រាស់ឧបករណ៍ធ្វើTest Kits បឋមលើម្ហូបអាហារចំនួន ៥៦គំរូ ដើម្បីស្វែងរកសារធាតុគីមីហាមឃាត់ ដែលធ្វើឱ្យប៉ះពាល់ដល់សុខភាពប្រជាពលរដ្ឋ ជាពិសេសក៏បានពិនិត្យទៅលើស្លាកដែលដាក់តាំងលក់ផងដែរ ។

មន្ត្រីដដែលបញ្ជាក់ទៀតថា ជាលទ្ធផលក្រោយពីការអនុវត្តការងារ មន្ត្រីជំនាញបានរកឃើញទំនិញខូចគុណភាព និងហួសកាលបរិច្ឆេទប្រើប្រាស់ ៥មុខ មានដូចជា៖ ទឹកត្រីកោះកុងចំនួន ៥០ដប និងនំធុង ៧ធុង តែកញ្ចប់ចំនួន ៣០កញ្ចប់ ថ្នាំដុសធ្មេញចំនួន ២៥ប្រអប់ និងប្រេងកូឡាចំនួន ២៧ប្រអប់ ហើយមន្ត្រីជំនាញបានធ្វើកំណត់ហេតុដកហូតទំនិញទាំងនោះ យកមករក្សាទុកដើម្បីធ្វើការដុតកម្ទេចចោលនៅពេលក្រោយ។

មន្ត្រីសាខាការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ និងមន្ទីរពាណិជ្ជកម្មខេត្ត នឹងបន្តចុះពិនិត្យមុខទំនិញឲ្យបានដូចភ្លៀងរលឹម ដើម្បីស្វែងរកសារធាតុដែលហាមឃាត់ (សារធាតុគីមី) ដែលធ្វើឲ្យអ្នកបរិភោគអាចប៉ះពាល់ដល់សុខភាព និងស្នើឲ្យអាជីវករចូលរួមសហការ ជាមួយមន្ត្រីជំនាញ ក្នុងការចុះត្រួតពិនិត្យទំនិញផ្សេងៗគ្រប់ភេទនៅតាមទីផ្សារក្នុងខេត្តផងដែរ ៕ដោយ៖យឹម សុថាន