លីកបាល់ទាត់កំពូលរបស់អូស្រ្តាលីគឺ A-League គ្រោងនឹងចាប់ផ្តើមប្រកួតឡើងវិញនៅថ្ងៃទី១៦ ខែកក្កដាខាងមុខនេះដោយក្រុម Melbourne Victory នឹងប្រកួតជាមួយ Western United កីឡដ្ឋាន AAMI Park ក្នុងទីក្រុង Melbourne ។

សហព័ន្ធកីឡាបាល់ទាត់អូស្រ្តាលី (FFA) បានបង្ហាញព័ត៌មានលម្អិតអំពីផែនការចាប់ផ្តើមឡើងវិញរបស់ខ្លួនកាលពីថ្ងៃអង្គារ បន្ទាប់ពី បានបញ្ចប់កិច្ចព្រមព្រៀងជាមួយភាគីពាក់ព័ន្ធដើម្បីបន្ថែមរយៈពេលរដូវកាល២០១៩-២០២០រហូតដល់ថ្ងៃទី៣១ ខែសីហា ឆ្នាំ២០២០។ទន្ទឹមនឹងនេះ FFA នឹងបន្តធ្វើការសហការជាមួយដៃគូយូរអង្វែងនៃការប្រកួតប្រជែងនេះ និងសហការជាមួយទូរទស្សន៍ស្ពតកីឡាដើម្បីទទួលបានការរៀបចំចាក់ផ្សាយផ្ទាល់ពីទីលានប្រកួត។

ការប្រកួតរបស់លីកកំពូលអូស្ត្រាលីគឺនៅសល់២៦ប្រកួតទៀតនៃរដូវនេះដែលនឹងត្រូវលេងក្នុងរយៈពេល២៨ថ្ងៃទើបចប់។ FFA នឹងចេញផ្សាយកាលវិភាគបន្ថែមទៀតឱ្យកាន់តែជិតព្រោះវារំពឹងថានឹងមានការសម្រាកបន្ថែមទៀតនៅក្នុងការគ្រប់គ្រងព្រំដែន និងការរឹតត្បិតការធ្វើដំណើរ ដោយសារជាវិធានការការពារជំងឺកូវីដ-១៩។

លោក Greg O’Rourke ប្រធាននៃលីករបស់ FFA បានពន្យល់ថា “យើងបានបង្កើតជំរើសជាច្រើនសម្រាប់ការបញ្ចប់រដូវកាលធម្មតា។ តាមច្បាប់សម្រាប់ហ្វូងមនុស្សនៅក្នុងពហុកីឡាដ្ឋាននឹងផ្លាស់ប្តូរចាប់ពីថ្ងទី ១ ខែកក្កដារដូវកាលនេះអាចត្រូវបានបញ្ចប់ដោយប្រកួតមាន ឬគ្មានអ្នកចូលទស្សនា” ។

លោក Greg O’Rourke បានបន្ថែមថា “យើងនឹងបន្តធ្វើការយ៉ាងជិតស្និទ្ធជាមួយរដ្ឋាភិបាលសហព័ន្ធនិងរដ្ឋក៏ដូចជាទីកន្លែងរបស់យើងដើម្បីពិចារណាពីរបៀបដែលយើងអាចផ្ទុកសមាជិកក្លឹប និងអ្នកគាំទ្រឱ្យបានច្រើនតាមដែលអាចធ្វើទៅបាននៅក្នុងការប្រកួតនៅពេលការប្រកួតចាប់ផ្តើម”។

ក្លឹប A-League បានត្រលប់មកហ្វឹកហាត់វិញនៅថ្ងៃពុធនេះ បន្ទាប់ពីការបញ្ចប់ការត្រួតពិនិត្យសុខភាពរកជំងឺកូវិដ-១៩ និងការអនុវត្តផែនការប្រតិបត្ដិការដើម្បីកាត់បន្ថយហានិភ័យនៃការឆ្លងមេរោគនៅតាមកន្លែងហ្វឹកហាត់ និងកន្លែងរបស់ក្លិប។

ប្រសិនបើមានការរឹតបន្តឹងបន្ថែមទៀតត្រូវបានបន្ធូរបន្ថយដូចជា ក្លឹបមកពី Victoria, Queensland និង South Australia អាចនឹងនៅតែបន្តលេងនៅក្នុងទីក្រុងកំណើតរបស់ពួកគេជាជាងផ្លាស់ទៅរស់នៅ New South Wales (NSW) ដើម្បីបញ្ចប់រដូវកាល ៕

ដោយ៖ ភិរក្ស