ភ្នំពេញ៖ យុវជន២នាក់ត្រូវបានកម្លាំងនគរបាលខណ្ឌដូនពេញធ្វើការឃាត់ខ្លួនក្រោយពីឆែកឃើញថ្នាំញៀនមួយកញ្ចប់ប្រភេទក្រាមសរថ្លានៅក្នុងខ្លួនពេលដែលពួកគេទិញបំណងយកទៅប្រើប្រាស់ ការឃាត់ខ្លួននេះបានធ្វើឡើង កាលពីវេលាម៉ោង២០និង២០នាទីថ្ងៃទី២៦ ខែមករា ឆ្នាំ២០១៦ នៅចំណុចផ្លូវរថភ្លើង តាមបណ្ដោយផ្លូវបឹងកក់(ផ្លូវR6)ស្ថិតក្នុងភូមិ៣ សង្កាត់ស្រះចក ខណ្ឌដូនពេញ រាជធានីភ្នំពេញ។
សមត្ថកិច្ចបានអោយដឹងថាមុនពេលឈានទៅដល់ការឃាត់ខ្លួនយុវជនទាំងពីរនាក់នោះគឺកម្លាំងអន្តរាគមន៍បានជិះល្បាតក្នុងមូលដ្ឋានដើម្បីការពារសុវត្តិភាពជូនដល់ប្រជាពលរដ្ឋ។ ពេលដែលល្បាតមកដល់ចំណុចកើតហេតុក៏បានឃើញយុវជនពីរនាក់ជិះម៉ូតូម៉ាកស៊ូស៊ូគី វីវ៉ា ពណ៍ខ្មៅ ពាក់ស្លាកលេខ កំពង់ស្ពឺ 1C-8374មួយគ្រឿង ជិះឌុបគ្នាដោយមានការសង្ស័យក៏ឃាត់ខ្លួនដើម្បីសួរនាំ ពេលនោះយុវជនដែលជិះខាងក្រោយបានបោះថ្នាំញៀនចូលក្នុងស្មៅតែត្រូវបានកម្លាំងសមត្ថកិច្ចក៏ធ្វើការឃាត់ខ្លួនតែម្ដង។
ក្រោយមកកម្លាំងសមត្ថកិច្ចបាននាំខ្លួនយុវជនទាំងពីរនាក់យកទៅសួរនាំនៅអធិការដ្ឋានខណ្ឌដូនពេញដើម្បីចាត់កាត់បន្តតាមនិតិវិធីច្បាប់៕
ដោយ៖ ព្រែកជ័យ
