ក្រុមខ្លាង Bayern Munich បានយកឈ្នះក្រុម Bayer Leverkusen ក្នុងលទ្ធផល ៤ទល់២ ក្នុងការប្រកួតពានរង្វាន់វគ្គផ្តាច់ព្រ័ត្រ German Cup កាលពីរាត្រីម្សិលមិញ។ ការលើកពានមួយនេះគឺជាពានរង្វាន់ធំលំដាប់ទី២បន្ទាប់ពីពានលីកកំពូលរបស់ក្រុម Bayern Munich នៅអាល្លឺម៉ង់។

ខ្សែប្រយុទ្ធឆ្នើម Robert Lewandowski បានស៊ុតបាល់បញ្ចូលទីគូប្រកួតចំនួន២គ្រាប់ដែលជាគ្រាប់បាល់ទី៥០ គ្រាប់សម្រាប់រដូវកាលនេះ ខណៈដែលក្រុម Bayern Munich បានផ្តួលក្រុម Bayer Leverkusen ដើម្បីឈ្នះពានរង្វាន់ German Cup លើកទី២០ និងជាលើកទី ១៣ ក្នុងស្រុក។

ការទាត់បាល់ពិន័យ Free-kick របស់កីឡាករ David Alaba នៅនាទីទី១៦ បានធ្វើឱ្យពួកគេនាំមុខ ហើយកីឡាករ Serge Gnabry បានបន្ថែមគ្រាប់ទី២នៅនាទីទី២៤ មុនពេលកីឡាករ Lewandowski រកបាន២គ្រាប់នៅនាទីទី៥៩ និងនាទីទី៨៩។ ចំណែកក្រុម Bayer Leverkusen រកបាន២គ្រាប់សងវិញនៅ នាទីទី៦៣ ដោយកីឡាករ Bender និងនាទីទី៩០ បានបាល់ពិន័យ១១ម៉ែត្រដោយកីឡាករ Havertz ។

សូមបញ្ជាក់ថា ក្រុម Bayern Munich បានបង្កើតកំណត់ត្រាថ្មីរបស់ក្លឹបចំនួន២៦ប្រកួតដែលមិនធ្លាប់មានពីមុនមក
គឺឈ្នះ១៧លើកជាប់គ្នាក៏ជាកំណត់ត្រារបស់ក្រុម Bayern ផងដែរ។ ក្រុម Bayern Munich នឹងត្រូវជួបជាមួយក្រុមតោខៀវ Chelsea ក្នុងពានរង្វាន់ Champions League វគ្គ១៦ ក្រុមចុងក្រោយនៅខែក្រោយបន្ទាប់ពីឈ្នះជើងទី១ក្នុងលទ្ធផល ៣-០ ៕

ដោយ៖ ភារៈ