ខេត្តបាត់ដំបង៖ ប្តី ប្រពន្ធ២នាក់ដែលរកស៊ីដឹកផ្លែឈើពីថៃមកលក់នៅកម្ពុជានោះ ត្រូវតៃកុងរថយន្ត និងបក្ខពួកច្រើននាក់ប្រដាប់ដោយដាវ និងកាំបិត ព្រួតគ្នាចាក់ កាប់បណ្តាលឲ្យរងរបួសជាទម្ងន់ ហើយត្រូវបញ្ជូនទៅសង្គ្រោះនៅមន្ទីរពេទ្យ បន្ទាប់ពីមានទំនាស់ពាក្យសម្តីគ្នាក្នុងរឿងទារលុយកាក់ ។
ហេតុការណ៍នេះបានកើតឡើងកាលពីវេលាម៉ោង២០និង៣០នាទី ថ្ងៃទី២៦ ខែមករា ឆ្នាំ២០១៦ ស្ថិតនៅចំណុចផ្លូវជាប់របងកាស៊ីណូមួយកន្លែង ក្នុងភូមិដូង ឃុំបឹងរាំង ស្រុកកំរៀង ខេត្តបាត់ដំបង ។
បុរសជាប្តីរងគ្រោះត្រូវបានស្គាល់ឈ្មោះ ហ៊ុល ហុកទ្រី អាយុជាង៤០ឆ្នាំ បានរងរបួសធ្ងន់ ដោយសារតែរងការវាយប្រហារត្រូវចំដៃឆ្វេង ចិញ្ចើមរយៈដល់បបូរមាត់ និងដៃខាងស្តាំ ។ រីឯប្រពន្ធដែលជាជនរងគ្រោះដែរនោះឈ្មោះ ប៊ូ ចាន់នីន អាយុ៣៨ឆ្នាំ រងរបួសស្រាល ។ ជនរងគ្រោះមានទីលំនៅជាមួយគ្នាក្នុងភូមិត្នោត ស្រុកបារាយ ខេត្តកំពង់ធំ និងមានមុខរបរដឹកផ្លែឈើមកពីថៃតាមច្រកអន្តរជាតិដូងទៅលក់នៅខេត្តកំពង់ធំ ។
ក្រោយពេលបង្កហេតុ ក្រុមជនសង្ស័យបានរត់គេចខ្លួនបាត់អស់ ។ ប៉ុន្តែក្នុងចំណោមនោះ គេបានស្គាល់ឈ្មោះជនសង្ស័យម្នាក់ឈ្មោះ រដ្ឋា អាយុ២០ឆ្នាំ ជាអ្នករត់តាក់ស៊ីពីស្រុកកំរៀង(ឡែម)ទៅកំពង់ធំ និងកំពង់ចាម ៕
ដោយ៖ សំ វិច្ឆិកា
