ខេត្តកណ្តាល៖ បុរសម្នាក់ដើរចេញពីផ្ទះទៅបេះត្រគួន បាត់មិនឃើញត្រឡប់មកផ្ទះវិញអសរយៈពេលពេញមួយយប់ស្រាប់តែព្រឹកឡើងមានប្រជាពលរដ្ឋប្រទះឃើញបុរសរូបនេះស្លាប់នៅក្នុងទឹកបឹងឈូកបង្កឲ្យមានការភ្ញាក់ផ្អើលនៅវេលាម៉ោង៥ និង៣០នាទីព្រឹក ថ្ងៃទី២៧ ខែមករា ឆ្នាំ២០១៦ ស្ថិតក្នុងភូមិព្រែកហូរលិច សង្កាត់ព្រែកហូរ ក្រុងតាខ្មៅ ។
មន្ត្រីនគរបាលក្រុងតាខ្មៅបានឲ្យដឹងថា ជនរងគ្រោះឈ្មោះ ជន សាវុធ ភេទប្រុស អាយុ៣៥ឆ្នាំ មុខរបរដើរបេះត្រគួនលក់ មានទីលំនៅក្នុងភូមិព្រែកហូរលិច១ សង្កាត់ព្រែកហូរ ក្រុងតាខ្មៅ ។ ជនរងគ្រោះរូបនេះជាមនុស្សញៀនស្រាផឹកស្រវឹងស្ទើររាល់ថ្ងៃ ពេលផឹកស្រាស្រវឹងជនរងគ្រោះឧស្សាហ៏ដើរចេញពីផ្ទះទៅបេះត្រគួននៅក្នុងបឹង ដើម្បីយកមកលក់ ។
ប្រភពដដែលបានបន្តថា នៅមុនពេលកើតហេតុគឺនៅថ្ងៃទី២៦ ខែមករា ឆ្នាំ២០១៦ វេលារសៀលជនរងគ្រោះបានផឹកស្រាស្រវឹង ហើយបានដើរចេញពីផ្ទះដោយប្រាប់ក្រុមគ្រួសារថាទៅបេះត្រគួននៅក្នុងបឹង និងដកក្រអៅឈូក ។ ក្រោយពីចេញពីផ្ទះនៅវេលារសៀលក្រុមគ្រួសារមិនបានឃើញជនរងគ្រោះត្រឡប់មកផ្ទះវិញទេ ធ្វើឲ្យក្រុមគ្រួសារមានក្តីបារម្មណ៍យ៉ាងខ្លាំងក៏នាំគ្នាតាមរកជនរងគ្រោះទាំងយប់ តែមិនឃើញនោះទេ ។ លុះព្រឹកឡើងថ្ងៃទី២៧ ខែមករា ឆ្នាំ២០១៦ ទើបមានប្រជាពលរដ្ឋដែលជាម្ចាស់ចម្ការឈូកប្រទះឃើញជនរងគ្រោះដេកស្លាប់ក្នុងចម្ការ ក៏រាយការណ៍ប្រាប់សមត្ថកិច្ចនគរបាលតែម្តង ។
មន្ត្រីនគរបាលបច្ចេកទេស និងវិទ្យាសាស្ត្រក្រុងតាខ្មៅបានបញ្ជាក់ថា នៅលើខ្លួនប្រាណសាកសពជនរងគ្រោះមិនមានស្លាកស្នាមអ្វីគួឲ្យកត់សម្គាល់នោះទេ ពោលគឺជនរងគ្រោះស្លាប់ដោយសារខ្យល់គ ។ ក្រោយពីពិនិត្យចប់សព្វគ្រប់រួចមក សមត្ថកិច្ចនគរបាលបានប្រគល់សាកសពជនរងគ្រោះទៅឲ្យក្រុមគ្រួសារយកទៅធ្វើបុណ្យតាមប្រពៃណី ៕
ដោយ៖ ស្អាងជ័យ
