ខេត្តកណ្តាល៖ មុខសញ្ញាប្រើប្រាស់គ្រឿងញៀន២នាក់ ត្រូវបានសមត្ថកិច្ចនគរបាលក្រុងតាខ្មៅចេញល្បាតនៅពេលយប់ចាប់ខ្លួនបាន កាលពីវេលាម៉ោង២៣ និង២០នាទី ថ្ងៃទី២៦ ខែមករា ឆ្នាំ២០១៦ នៅលើកំណាត់ផ្លូវជាតិលេខ២ ស្ថិតក្នុងភូមិក្រពើហារ សង្កាត់ព្រែកឫស្សី ក្រុងតាខ្មៅ ខេត្តកណ្តាល ។
មន្ត្រីនគរបាលក្រុងតាខ្មៅបានឲ្យដឹងថា ជនសង្ស័យ២នាក់ជាមុខសញ្ញាប្រើប្រាស់គ្រឿងញៀនដែលត្រូវបានឃាត់ខ្លួននោះ ទី១-ឈ្មោះ ផល វ៉ាន់នី ភេទប្រុស អាយុ២១ឆ្នាំ មុខរបរមិនពិតប្រាកដ ទី២-ឈ្មោះ កឺម ចន្ថា ភេទប្រុស អាយុ១៩ឆ្នាំ មុខរបរមិនពិតប្រាកដ ។ ជនសង្ស័យទាំង២នាក់មានទីលំនៅក្នុងភូមិព្រែកឫស្សី សង្កាត់ព្រែកឫស្សី ក្រុងតាខ្មៅ ។ ក្នុងប្រតិបត្តិការឃាត់ខ្លួនជនសង្ស័យ សមត្ថកិច្ចបានធ្វើការដកហូតថ្នាំញៀនមេតំហ្វេតាមីន២កញ្ចប់តូច និងម៉ូតូមួយគ្រឿងម៉ាកស៊ុយហ្ស៊ូគី ស្តេប ពណ៌ខ្មៅ ពាក់ស្លាកលេខភ្នំពេញ1I-5076។
ប្រភពដដែលបានបន្តថា នៅវេលាយប់ថ្ងៃទី២៦ ខែមករា ឆ្នាំ២០១៦ សមត្ថកិច្ចនករបាលក្រុងតាខ្មៅបានផ្លាស់ប្តូរវេណគ្នាចេញល្បាតតាមដងផ្លូវ ខណៈនោះបានប្រទះឃើញជនសង្ស័យជិះម៉ូតូឌុបគ្នាក៏ហៅឲ្យឈប់សុំធ្វើការត្រួតពិនិត្យឆែកឆេរ រហូតឈានដល់រកឃើញមានវត្ថុតាងជាក់ស្តែងឃាត់ខ្លួន ដើម្បីកសាងសំណុំរឿងចាត់ការតាមច្បាប់ ៕
ដោយ៖ ស្អាងជ័យ
