ភ្នំពេញ៖ សមត្ថកិច្ចនគរបាលប៉ុស្តិ៍ជ្រោយចង្វាឃាត់ខ្លួនជនសង្ស័យ៣នាក់ពាក់ព័ន្ធករណីរក្សាទុកនូវសារធាតុញៀនដោយខុសច្បាប់ ដកហូតបានថ្នាំញៀន១កញ្ចប់ធំ និងម៉ូតូ០១គ្រឿង ។
ការឃាត់ខ្លួននេះធ្វើឡើងនៅម៉ោង៦ល្ងាច ថ្ងៃទី២៦ ខែមករា ឆ្នាំ២០១៦ នៅចំណុចមុខវត្តគៀនឃ្លាំង ស្ថិតនៅក្នុងភូមិគៀនឃ្លាំង សង្កាត់-ខណ្ឌជ្រោយចង្វា ។
សមត្ថកិច្ចនគរបាលខណ្ឌជ្រោយចង្វាបាឲ្យដឹងថា ជនសង្ស័យដែលឃាត់ខ្លួនខាងលើមាន១.ឈ្មោះ ឡុង ធារ័ត្ន អាយុ២៤ឆ្នាំ មុខរបរនៅផ្ទះ ស្នាក់នៅឃុំកំពង់ពពិល ស្រុកពារាំង ខេត្តព្រៃវែង ២.ឈ្មោះចេវ លីហេង ហៅហេង អាយុ២៥ឆ្នាំ មុខរបរមិនពិតប្រាកដ ស្នាក់នៅឃុំកំពង់ពពិល ស្រុកពារាំង ខេត្តព្រៃវែង ៣.ឈ្មោះ យុន គីមស្រុន អាយុ២៤ឆ្នាំ មុខរបរចិញ្ចឹមសត្វចង្រិត ស្នាក់នៅឃុំកំពង់ពពិល ស្រុកពារាំង ខេត្តព្រៃវែង ។
យោងតាមរបាយការណ៍របស់សមត្ថកិច្ចនគរបាលខណ្ឌបានឲ្យដឹងថា កាលពីថ្ងៃទី២៦ ខឍែមករា ឆ្នាំ២០១៦ ម៉ោង២រសៀល ជនសង្ស័យទាំងបីនាក់បានជួបជុំគ្នា នៅឃុំកំពង់ពពិល ស្រុកពារាំង ខេត្តព្រៃវែង ដោយបបួលគ្នារៃលុយឡើងមកភ្នំពេញដើម្បីទិញថ្នាំញៀន។ ក្រោយពីនិយាយត្រូវរ៉ូវគ្នាហើយទើបជនសង្ស័យទាំងបីនាក់នាំគ្នាបើកម៉ូតូ១គ្រឿងម៉ាកស៊ុយស៊ូគីឡែត ពាក់ស្លាកលេខព្រៃវែង 1FQ-7267 ឌុបគ្នាមកឆ្លងស្ពានព្រែកតាម៉ាក់ រួចមកតាមផ្លូវជាតិលេខ៦។ លុះឌុបគ្នាមកដាល់ម្តុំក្តាន់ពីរ ជនសង្ស័យបានទិញថ្នាំញៀនពីអ្នកលក់បាន ១កញ្ចប់ធំ រួចនាំគ្នាបើកម៉ូតូត្រឡប់មកភូមិវិញ ដោយបើកមកឆ្លងស្ពានជ្រោយចង្វា មកដល់ម្តុំមុខវត្តគៀនឃ្លាំង សង្កាត់-ខណ្ឌជ្រោយចង្វា បានជួបនឹងកម្លាំងល្បាតខណ្ឌ ដោយមានការសង្ស័យទើបហៅឲ្យឈប់ រួចឆែកឆេរ ខ្លួនជនសង្ស័យទាំងបីនាក់ បានរកឃើញថ្នាំញៀន០១កញ្ចប់ធំ ទើបឃាត់ខ្លួនជនសង្ស័យទាំងបីនាក់នាំមកកាន់អធិការដ្ឋាននគរបាលខណ្ឌជ្រោយចង្វា ដើម្បីសាកសួរ។ វត្ថុតាងដកហូតរួមមានក្រាមពណ៌សថ្លា ប្រភេទម៉ាទឹកកក០១កញ្ចប់ធំ ម៉ូតូម៉ាកស៊ុយស៊ូគីឡែត១គ្រឿង ។
បច្ចុប្បន្នជនសង្ស័យទាំងបីនាក់ រួមនឹងវត្ថុងតាងត្រូវបានសមត្ថកិច្ចនគរបាលខណ្ឌជ្រោយចង្វាកំពុងឃាត់ខ្លួនបណ្តោះអាសន្ន ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញចាត់ការបន្តតាមនីតិវិធី ៕
ដោយ៖ ជ្រោយពេជ្រ
