ភ្នំពេញ៖ យុវជន២នាក់បើកម៉ូតូមួយគ្រឿងអត់ស្លាកលេខ តាមផ្លូវចេញពីធ្វើការ ត្រឡប់ទៅផ្ទះវិញ ក៏ត្រូវកម្លាំងសមត្ថកិច្ចនគរបាល២នាក់ បើកម៉ូតូធំម៉ាក FTR ពណ៌ខៀវ មួយគ្រឿង ដេញតាមឃាត់ឲ្យឈប់ តែយុវជនទាំង២នាក់នោះ ភ័យពេក ក៏ព្យាយាមបើកម៉ូតូរត់គេច រហូតដល់កែងផ្លូវច្រកចូលផ្ទះ ក៏ផ្តួលម៉ូតូ ហៅអោយក្រុមគ្រួសារជួយ តែត្រូវកំលាំងសមត្ថកិច្ចនគរបាលដែលបើកម៉ូតូដេញតាមនោះ ចាប់បានម្នាក់វាយឡើងទ្រមខ្លួន រួច ដកកាំភ្លើងបាញ់ប្រហារ១គ្រាប់ចំស្មាខាងឆ្វេង បណ្តាលអោយរបួសធ្ងន់ដេកដួលក្នុងថ្លុកឈាម ។ ក្រោយពេលកើតហេតុ សមត្ថកិច្ចនគរបាលទាំង២នាក់នោះ បានបើកម៉ូតូរត់គេចខ្លួនបាត់ស្រមោល ។
ហេតុការណ៍នេះកើតឡើងកាលពីម៉ោងជាង១០យប់ នៅតាមបណ្តោយផ្លូវលេខ៧០ ស្ថិតក្នុងភូមិទួលគោក សង្កាត់ទួលសង្កែ ខណ្ឌឬស្សីកែវ រាជធានីភ្នំពេញ ។
យុវជនរងគ្រោះខាងលើត្រូវគេស្គាល់ឈ្មោះសុខ ឡាយ អាយុ២១ឆ្នាំ មុខជួសជុលរថយន្ត នៅម្តុំរង្វង់ទួលគោក ស្នាក់នៅសង្កាត់ទួលសង្កែ ខណ្ឌឬស្សីកែវ រាជធានីភ្នំពេញ ។
ប្រភពព័ត៌មាននៅកន្លែងកើតហេតុបានអោយដឹងថា មុនពេលកើតហេតុគេបានឃើញយុវជន២នាក់ បើកម៉ូតូម៉ាកហុងដា MSX ពណ៌ស អត់ស្លាកលេខ មួយគ្រឿង តាមបណ្តោយផ្លូវ៧០ ក្នុងទិសដៅពីកើតទៅលិច ហើយក៏ឃើញមានសមត្ថកិច្ចនគរបាន២នាក់ (ស្លៀកឯកសណ្ឋានសមត្ថកិច្ចនគរបាល) បើកម៉ូតូ FTR ពណ៌ខៀវ មួយគ្រឿង អត់ចាំស្លាកលេខ តាមពីក្រោយ ហើយស្រែកអោយយុវជនទាំង២នាក់នោះឈប់ ដោយមានកាំភ្លើងវែងមួយដើម ដេញភ្ចង់យុវជនទាំង២នាក់នោះអោយឈប់រហូត ទើបធ្វើអោយយុវជនទាំង២នាក់ភ័យស្លន់ស្លោរ ក៏ព្យាយាមជិះដល់ផ្លូវកែងបត់ចូលផ្ទះ ក៏ផ្តួលម៉ូតូហើយរត់ទៅហៅក្រុមគ្រួសារអោយជួយ តែពេលនោះក៏ត្រូវកំលាំងសមត្ថកិច្ចចាប់បានយុវជនម្នាក់ជាអ្នកអង្គុយខាងក្រោយ ហើយកំលាំងសមត្ថកិច្ចទាំង២នាក់នោះក៏បានវាយយ៉ាងចាស់ដៃហើយស្រែកថា យុវជនរងគ្រោះនេះជាចោរប្លន់ ធ្វើអោយប្រជាពលរដ្ឋនៅក្បែរៗនោះរត់ទៅមើល ស្រាប់តែមន្ត្រីប៉ូលិសម្នាក់ក្នុងចំណោម២នាក់នោះបានដកកាំភ្លើងខ្លីចេញពីចង្កេះបាញ់ប្រហារ ១គ្រាប់ចំក្រោមស្មាខាងឆ្វេងធ្លាយហូរឈាមជោក ។ ក្រោយពេលឃើញជនរងគ្រោះមានសភាពបែបនេះ សមត្ថកិច្ចនគរបាលទាំង២នាក់នោះភ័យក៏បើកម៉ូតូរត់គេចបាត់។
ក្រោយពេលកើតហេតុ យុវជនរងគ្រោះត្រូវបានក្រុមគ្រួសារហៅរថយន្តសាមុយដឹកយកទៅសង្គ្រោះនៅមន្ទីរពេទ្យកាលម៉ែត ។
ជុំវិញហេតុការណ៍ខាងលើនេះ ប្រជាពលរដ្ឋនៅកន្លែងកើតហេតុបាន រិះគន់លោកមេប៉ុស្តិ៍ទួលសង្កែយ៉ាងចាស់មាត់ ក្រោយពេលលោកមេប៉ុស្តិ៍ទួលសង្កែនោះបាន ចុះទៅដល់កន្លែងកើតហេតុមិនព្រមសាកសួរព័ត៌មានពីភិនភាគខ្មាន់កាំភ្លើងបាញ់ប្រហារជនរងគ្រាះ ដែលប្រជាពលរដ្ឋប្រាប់ថា ជាប៉ូលិស២នាក់ ហើយតាមចាប់នោះទេ បែរជាលោកមេប៉ុស្តិ៍ទួលសង្កែរូបនោះគិតតែពីទៅឈរឈ្លោះប្រកែកជាមួយប៉ូលិសខណ្ឌដូនពេញរឿងកើតឡើងនៅក្នុងទឹកដីអញមែន តែវាដេញពីទឹកដីខណ្ឌដូនពេញពួកហ្អែងជាងកន្លះម៉ោងទៅវិញ ៕
ដោយ៖ ជ្រោយពេជ្រ
