អាមេរិក៖ មនុស្សជាច្រើនបង្ហាញការភ្ញាក់ផ្អើលយ៉ាងខ្លាំងក្រោយពេលតារាស្រីដ៏ល្បីល្បាញ នាងប៉ារីស
ហ៊ីលតុន (Paris Hilton) បានប្រកាសប្រជែងតំណែងប្រធានាធិបតីអាមេរិក។ មិនតែប៉ុណ្ណោះ នាងបានប្រកាសថា នឹងប្តូរពណ៌សេតវិមាន«White house»ទៅជា «Pink house»វិញ។
តារាដ៏ល្បីល្បាញរបស់ហូលីវូដនិងជាអ្នកជំនួញដ៏ជោគជ័យ នាងប៉ារីសហ៊ីលតុន អាយុ៣៩ឆ្នាំបានប្រកាសថា «នេះជាការបោះឆ្នោតដ៏សំខាន់បំផុតរបស់យើង។ សន្លឹកឆ្នោតនិីមួយៗគឺបានបង្កើតឲ្យមានការខុសប្លែកគ្នា ដូច្នេះមនុស្សគ្រប់រូបត្រូវតែទៅបោះឆ្នោត»។
នាង ប៉ារីស ហ៊ីលតុនក៏បានបង្ហាញពាក្យស្លោកសម្រាប់យុទ្ធនាការឃោសនាបោះឆ្នោតរបស់ខ្លួនដែរ គឺ “Let’s Make America Hot Again #Paris For President” (ធ្វើឲ្យអាមេរិកទាក់ទាញឡើងវិញ)។ ទន្ទឹមនឹងនោះ នាង ប៉ារីស ហ៊ីលតុនក៏បានបញ្ជាក់ផងដែរថា អ្វីដែលនាងត្រូវធ្វើដំបូងគេបង្អស់ពេលក្លាយជាប្រធានាធិបតីអាមេរិក គឺប្តូរពណ៌សេតវិមានពីពណ៌សទៅជាពណ៌ផ្កាឈូកវិញ។
នាងប៉ារីស ហ៊ីលតុន ធ្លាប់ធ្វើឲ្យកក្រើកហូលីវូដ ប៉ុន្តែប៉ុន្មានឆ្នាំចុងក្រោយនេះនាងតិចបង្ហាញខ្លួនជាសាធារណៈណាស់ ទាំងនោះហើយបានជាមនុស្សជាច្រើនយល់ឃើញថា នាងបានចាកចេញពីសិល្បៈ ដោយផ្តោតទៅលើមុខជំនួញរបស់គ្រួសារវិញ។ ប៉ុន្តែការប្រកាសចូលរួមប្រកួតប្រជែងតំណែងប្រធានាធិបតីអាមេរិក ធ្វើឲ្យ កក្រើកវិស័យសិល្បៈជាថ្មី ។
មនុស្សជាច្រើនយល់ឃើញថា សកម្មភាពរបស់នាងប៉ារីស ហ៊ីលតុន ដែលបានប្រកាសប្រជែងតំណែងប្រធានាធិបតីអាមេរិក គឺគ្រាន់តែជាយុទ្ធសាស្ត្របង្កើនការចាប់អារម្មណ៍ជាថ្មីមកលើខ្លួនតែប៉ុណ្ណោះ ដើម្បីផលប្រយោជនអាជីវកម្មរបស់នាង៕
ដោយ៖ ធី រីណា
