ភ្នំពេញ៖ នៅព្រឹកថ្ងៃទី២៨ ខែមករា ឆ្នាំ២០១៦កម្លាំងនគរបាលព្រហ្មទណ្ឌខណ្ឌជ្រោយចង្វាបង្ហាញមុខជនសង្ស័យ៤នាក់ដែលជាមុខសញ្ញាជួញដូរគ្រឿងញៀន។
សមត្ថកិច្ចនគរបាលខណ្ឌជ្រោយចង្វាបានឲ្យដឹងថា ជនសង្ស័យខាងលើត្រូវបានកម្លាំងព្រហ្មទណ្ឌខណ្ឌជ្រោយចង្វា សហការជាមួយកម្លាំងប៉ុស្តិ៍ជ្រោយចង្វាឃាត់ខ្លួនបានជនសង្ស័យ៣នាក់ កាលពីម៉ោង៩ព្រឹកថ្ងៃទី២៧ ខែមករា ឆ្នាំ២០១៦នេះ នៅចំណុចមុខវត្តគៀនឃ្លាំង តាមផ្លូវជាតិលេខ៦ ភូមិគៀនឃ្លាំង សង្កាត់-ខណ្ឌជ្រោយចង្វា យកមកសួរនាំ ទើបឈានទៅឃាត់ខ្លួនជនសង្ស័យម្នាក់ទៀតនៅរកាកោង។
សមត្ថកិច្ចនគរបាលបានឲ្យដឹងថា ជនសង្ស័យទាំង៣នាក់នោះរួមមាន៖ ទី១/ ឈ្មោះ ទូច ម៉េងហ័រ ភេទប្រុស អាយុ២២ឆ្នាំ មុខរបរមិនពិតប្រាកដ ស្នាក់នៅភូមិរកាកោង ឃុំរកាកោង ស្រុកមុខកំពូល ខេត្តកណ្តាល ទី២/ ឈ្មោះ ឃៀង គឹមហ័រ ភេទប្រុស អាយុ២០ឆ្នាំ មុខរបរមិនពិតប្រាកដ ស្នាក់នៅសង្កាត់ផ្សារដេប៉ូ ខណ្ឌទួលគោក ទី៣/ ឈ្មោះ វុធ មករា ភេទប្រុស អាយុ១៥ឆ្នាំ មុខរបរសិស្សថ្នាក់ទី១០ នៅវិទ្យាល័យវត្តកោះ មានទីលំនៅសង្កាត់អូរឬស្សី១ ខណ្ឌ៧មករា និងម្នាក់ទៀតដែលសមត្ថកិច្ចឃាត់ខ្លួន មានឈ្មោះឃឿន និត ភេទប្រុស អាយុ២៩ឆ្នាំ មានទីលំនៅភូមិអន្លុងគគីរ ឃំុព្រែកតាកុយ ស្រុកកងមាស ខេត្តកំពង់ចាម ។
សមត្ថកិច្ចបានបន្តថា នៅពេលឃាត់ខ្លួនជនសង្ស័យ៤នាក់ខាងលើនេះ កម្លាំងសមត្ថកិច្ចរកឃើញគ្រឿងញៀន ( ក្រាមពណ៌សថ្លា ) ចំនួន៤៣កញ្ចប់ និងម៉ូតូសងប៉ិច១គ្រឿង ពាក់ស្លាកលេខភ្នំពេញ1FO-3822រួមនិងសម្ភារៈមួយចំនួន។
បច្ចុប្បន្នជនសង្ស័យទាំង៤នាក់កំពុងឃាត់ខ្លួនបណ្តោះអាសន្ននៅអធិការដ្ឋាននគរបាលខណ្ឌជ្រោយចង្វា ដើម្បីកសាងសំណុំរឿងចាត់ការតាមនីតិវិធី៕
...
ដោយ៖ ជ្រោយពេជ្រ
