ក្លិប Flamengo បាននិងកំពុងកំណត់បញ្ជីឈ្មោះលោក Domenec Torrent សញ្ជាតិអេស្ប៉ាញ និងលោក Carlos Carvalhal សញ្ជាតិព័រទុយហ្គាល់ជាបេក្ខជនសំខាន់សម្រាប់តំណែងជាគ្រូបង្វឹកដែលក្លិបកំពុងទំនេរ ។ នេះបើយោងតាមរបាយការណ៍សារព័ត៌មានក្នុងប្រទេសប្រេស៊ីលនៅព្រឹកថ្ងៃចន្ទ ទី២៧ កក្កដានេះ។

ទីភ្នាក់ងារសារព័ត៌មាន Gazeta Esportiva បានរាយការណ៍ថា អនុប្រធានក្លិប Flamengo លោក Marcos Braz និងនាយកប្រតិបត្តិលោក Bruno Spindel បច្ចុប្បន្នកំពុងស្ថិតក្នុងទ្វីប អឺរ៉ុបដើម្បីពិភាក្សាជាមួយអ្នកទាំង២។

លោក Domenec គឺជាអតីតជំនួយការរបស់លោក Pep Guardiola នៅឯក្លិប Barcelona, ​​Bayern Munich និង Manchester City មុនពេលចូលរួមជាមួយក្លិប New York City ក្នុងនាមជាគ្រូបង្វឹក កាលពីខែមិថុនា ឆ្នាំ២០១៨។ ចំណែកលោក Carvalhal បច្ចុប្បន្នជាអ្នកគ្រប់គ្រងក្លិប Rio Ave របស់ព័រទុយហ្គាល់ត្រូវបានគេយល់ថា ជាមនុស្សដែលស័ក្តិសមទទួលតំណែងនេះ។

បុរសវ័យ៥៤ឆ្នាំលោក Carvalhal បាននិយាយថា គាត់បានទទួលការផ្តល់ជូនពីក្លិបជាច្រើនបន្ទាប់ពី Rio Ave ទទួលបានកៅអី Europa League ជាមួយនឹងជ័យជម្នះ ២-០ ទៅលើក្រុម Boa Vista នៅក្នុងការប្រកួតចុងក្រោយនៃរដូវកាលនេះកាលពីថ្ងៃសៅរ៍កន្លងទៅ។

សូមបញ្ជាក់ថា ក្លិប Flamengo បាននិងកំពុងស្វែងរកគ្រូបង្វឹកម្នាក់ចាប់តាំងពីថ្ងៃទី១៧ ខែកក្កដានៅពេលដែលលោក Jorge Jesus បានលាលែងពីតំណែងដើម្បីទៅទទួលធ្វើជាគ្រូបង្វឹកអតីតក្លិបរបស់គាត់ Benfica។ បុរសវ័យ៦៥ ឆ្នាំរូបនេះធ្លាប់បានដឹកនាំក្រុម Klap Ya Handz ទីក្រុង Rio ទទួលបានពានរង្វាន់ចំនួន៦ក្នុងរយៈពេល១៣ ខែ រួមទាំងពានរង្វាន់ Serie A របស់ប្រេស៊ីលកាលពីឆ្នាំមុន និងពានរង្វាន់ Copa Libertadores ផងដែរ៕

ដោយ៖ ភារៈ