ភ្នំពេញ ៖ ក្រុមអ្នកព្យាកក្រសួងធនធានទឹកនៅថ្ងៃទី២៨ ខែកក្កដា ឆ្នាំ២០២០នេះ បានចេញសេចក្ដីជូនដំណឹងប្រាប់អោយ សូមបន្ដប្រុងប្រយ័ត្នចំពោះបាតុភូត ផ្គរ រន្ទះ និងខ្យល់កន្ត្រាក់ ខណៈចាប់ពីថ្ងៃទី៣១ ខែកក្កដា ដល់ថ្ងៃទី ០៤ ខែសីហា ផ្នែកខ្លះនៃបណ្តាខេត្តនៅទីទំនាបជាប់ជួរភ្នំ និងផ្លូវទឹក សូមប្រុងប្រយ័ត្នចំពោះជំនន់ទឹកភ្លៀង។ ដោយឡែក នៅលើផ្ទៃសមុទ្រនឹងអាចមានភ្លៀងធ្លាក់ច្រើន និងរលកសមុទ្របក់បោកខ្លាំងចាប់ពីថ្ងៃទី០១-០៣ ខែសីហា ខាងមុខនេះ ។
ក្រុមអ្នកព្យាកក្រសួងធនធានទឹកប្រាប់ទៀតថា ចាប់ពីថ្ងៃទី២៩ ខែកក្កដា ដល់ថ្ងៃទី០៤ ខែសីហា ឆ្នាំ២០២០នេះមានការប្រែប្រួលជាបន្តបន្ទាប់ នៃស្ថានភាពអាកាសធាតុសង្កេតឃើញថាខ្យល់មូសុងនិរតីបក់ក្នុងកម្រិតបង្ហូរមកលើកម្ពុជា ខណៈប្រព័ន្ធសម្ពាធទាបអូសបន្លាយលើប្រទេសថៃ ឡាវ និងវៀតណាម។
ក្រុមអ្នកព្យាកក្រសួងធនធានទឹកបានបញ្ជាក់ថា ស្ថានភាពបែបនេះធ្វើឲ្យបណ្តាខេត្តចំនួន៣រួមមាន ៖ បណ្តាខេត្តនៅតំបន់វាលទំនាបកណ្ដាលភ្លៀងនឹងអាចធ្លាក់រាយប៉ាយ ជាមួយនិងបរិមាណពីមធ្យមទៅច្រើន ក្នុងនោះក៏មានផ្នែកខ្លះអាចមានភ្លៀងធ្លាក់ខ្លាំង ,បណ្ដាខេត្តនៅតំបន់ជួរភ្នំដងរែក និងខ្ពង់រាបឦសាន ៖នឹងអាចមានភ្លៀងធ្លាក់រាយប៉ាយ នៅក្នុងកម្រិតពីមធ្យមទៅបង្ហូរ ក្នុងនោះក៏មានផ្នែកខ្លះអាចមានភ្លៀងធ្លាក់ច្រើន រីឯបណ្ដាខេត្តទៅតំបន់មាត់សមុទ្រវីញ ៖ នឹងអាចមានភ្លៀងធ្លាក់រាយប៉ាយនៅក្នុងកម្រិតពីតិចទៅបង្គួរ ៕ ដោយ ៖ សុខខេមរា
