អន្តរជាតិ៖ អគ្គនាយកអង្គការសុខភាពពិភពលោក លោក Tedros Adhanom Ghebreyesus បានកោតសរសើរប្រទេសកម្ពុជា និងប្រទេសចំនួន៤ផ្សេងទៀតដែលអាចទប់ស្កាត់ការរាលដាលជំងឺ COVID-19 ទ្រង់ទ្រាយធំក្នុងប្រទេសរៀងៗខ្លួន។ ខណៈដែលប្រទេសទាំងអស់នេះបានអនុវត្តវិធានការសុខាភិបាលមានប្រសិទ្ធភាព ជាមូលហេតុនាំឲ្យស្ថានភាពជំងឺផ្លូវដង្ហើមមួយនេះប្រទេសទាំង៥ មិនមានលក្ខណៈធ្ងន់ធ្ងរដូចប្រទេសផ្សេង ។ ការលើកឡើងបែបនេះ ប្រមុខអង្គការសុខភាពពិភពលោក បានថ្លែងនៅក្នុងសន្និសីទសារព័ត៌មានតាមប្រព័ន្ធអនឡាញនៅថ្ងៃទី២៧ ខែកក្កដាថ្មីៗនេះ។
លោកអគ្គនាយកអង្គការសុខភាពពិភពលោក ក៏បានបញ្ជាក់ពីឈ្មោះប្រទេស៥ ដែលអនុវត្តការណែនាំបានត្រឹមត្រូវដែលឈានដល់ការទប់ស្កាត់យ៉ាងមានប្រសិទ្ធភាពការផ្ទុះជំងឺ COVID-19 ក្នុងប្រទេសពួកគេ ស្របពេលប្រទេសខ្លះទៀតអាចគ្រប់គ្រងជំងឺបានទៀតផង។
លោក Tedros បានលើកឡើងជាថ្មី ចំពោះវិធានការដែលត្រូវអនុវត្តដើម្បីប្រយុទ្ធជំងឺនេះរួមមានរក្សាគម្លាត លាងដៃ ជៀសវាងកន្លែងមានមនុស្សកកកុញ និងពាក់ម៉ាស់ពេលចាំបាច់។ បើអនុវត្តតាមវិធានការទាំងនេះ លោក Tedros អះអាងថា ករណីឆ្លងធ្លាក់ចុះ ហើយបើមិនធ្វើតាមទេ គឺករណីឆ្លងកើនឡើង។
ត្រង់នេះអគ្គនាយក WHO ក៏បានចុចឈ្មោះប្រទេសដែលធ្វើបានល្អផងដែរ «ប្រទេស និងសហគមន៍ ដែលអនុវត្តតាមការណែនាំនេះដោយប្រយ័ត្ន និងជាប្រចាំ មានលទ្ធផលល្អ មិនថាក្នុងការទប់ស្កាត់ការរាលដាលទ្រង់ទ្រាយធំដូចជា៖ ប្រទេសកម្ពុជា នូវែលសេឡង់ រវ៉ាន់ដា ថៃវៀតណាម និងកោះនៅតំបន់ការ៉ាអ៊ីប ឬក៏ការគ្រប់គ្រងបានផ្ទុះរាលដាលដូចជានៅកាណាដា ចិន អាល្លឺម៉ង់ និងកូរ៉េខាងត្បូង។» លោកTedros និយាយបែបនេះ ហើយបន្ថែមទៀតថា មានប្រទេសជាច្រើនទៀតក៏ធ្វើបានល្អផងដែរ។
បើគិតត្រឹមថ្ងៃទី២៩ ខែកក្កដា ឆ្នាំ២០២០នេះ ប្រទេសកម្ពុជា មានករណីឆ្លង COVID-19 ចំនួន ២៣៣នាក់ ។ ចំពោះករណីសះស្បើយឡើងដល់១៥៤នាក់ ដែលស្មើនឹង៦៦.០៩ភាគរយ ហើយមិនមានករណីស្លាប់ឡើយ។ នៅកម្រិតពិភពលោកវិញ ករណីឆ្លងជំងឺនេះមានច្រើនជាង១៦លាននាក់ និងស្លាប់ជាង៦៦ម៉ឺននាក់៕ដោយ៖ស តារា
