ខេត្តកណ្ដាល៖ អភិបាលស្រុកកៀនស្វាយ លោក អ៊ូ ឈៀង បានព្រមានចាត់វិធានការតាមច្បាប់ និងឲ្យបញ្ឈប់ជាបន្ទាន់ចំពោះសកម្មភាពយ៉ាងអនាធិបតេយ្យរបស់មនុស្សមួយក្រុម បានអូសនាំពលរដ្ឋរាប់សិបនាក់ទៅចាប់យកដីធ្វើជាកម្មសិទ្ធិរបស់ខ្លួន នៅឃុំបន្ទាយដែក ដែលអាចនាំឲ្យកើតចលាចលនៅតាមមូលដ្ឋាន។
ការលើកឡើងបែបនេះ អភិបាលស្រុកកៀនស្វាយ បានបញ្ជាក់កាលពីល្ងាចថ្ងៃទី៥ ខែសីហា ឆ្នាំ២០២០ម្សិលមិញថា មានមនុស្សមួយក្រុមបាន បំផុសបំផុលឱ្យពលរដ្ឋទៅកាន់កាប់រំលោភយកដីកម្មសិទ្ធិអ្នកដទៃ នៅឃុំបន្ទាយដែក ហើយនោះជាទង្វើខុសច្បាប់ ដូច្នេះសូមឲ្យពួកគេបញ្ឈប់ជាបន្ទាន់ព្រោះនាំឲ្យកើតចលាចល ។
បន្ថែមពីនេះទៅទៀត លោកអភិបាលស្រុក បានសង្កត់ថា «ចំពោះករណីបំផុសបំផុលនេះ មានមេក្លោងប៉ុន្មាននាក់ ដើរញុះញង់ប្រជាជនឲ្យទៅយកដីគេទាំងកំរោល ដោយមិនគិតថា ជាដីកម្មសិទ្ធិនរណានោះឡើយ នេះហើយដែលរូបភាពមើលទៅអនាធិបតេយ្យ»។
គួរបញ្ជាក់ថា ជុំវិញបញ្ហាខាងលើនេះដែរ ពលរដ្ឋដែលមានដីមានប្លង់កម្មសិទ្ធិនៅម្តុំនោះ ក៏បានប្រាប់ថា ពួកគាត់មានការព្រួយបារម្ភយ៉ាងខ្លាំងព្រោះដីនេះទិញពីពលរដ្ឋម្ចាស់ដីដោយឲ្យលុយពេញថ្លៃ ហើយមានលិខិតស្នាមទទួលស្គាល់ពីអាជ្ញាធរ ពិសេសមានប្លង់កម្មសិទ្ធិត្រឹមត្រូវថែមទៀតផង។ ប៉ុន្តែប្រសិនបើជាពលរដ្ឋទាំងនោះ នៅតែបន្តសកម្មភាពបែបនេះទៀត គឺដូចជាប្លន់គេទាំងរស់អីចឹងដែរ ។
លោកអភិបាលស្រុកបន្តថា ដោយសារតែបញ្ហាបានកើតឡើងជាញឹកញ៉ាប់ ទើបនាពេលកន្លងទៅថ្មីៗ លោកធ្លាប់បើកវេទិការសាធារណៈពន្យល់ពលរដ្ឋឲ្យយល់ពីនីតិវិធី និងភូមិសាស្ត្រដីតំបន់នេះ ពិសេសផ្ដោតសំខាន់ទៅលើកម្មសិទ្ធិ ផ្ទាល់ខ្លួនដែរ មានម្ចាស់ដីមានប្លង់កម្មសិទ្ធិត្រឹមត្រូវតាំងពីឆ្នាំ២០១៧មកម្ល៉េះ ។ ប៉ុន្តែបែរជាពលរដ្ឋចោទប្រកាន់លោកអភិបាលស្រុកឃុបឃិតគ្នា ត្រូវរ៉ូវគ្នាជាមួយឈ្មួញអ្នកមានលុយទៅវិញ ហើយបង្កើនសកម្មភាពរបស់ខ្លួនដោយមិនញញើតច្បាប់នោះឡើយ។
ចុងក្រោយលោកអភិបាលស្រុក បានបញ្ជាក់ថា បើសិនលោកទទួលបានពាក្យបណ្ដឹងពីម្ចាស់ដីលើករណីនេះ លោកនឹងដោះស្រាយតាមនីតិវិធីផងដែរ ៕ដោយ៖ស តារា
