អន្តរជាតិ៖ យ៉ាងហោចណាស់បាតុករថៃប្រមាណជា១ម៉ឺននាក់ កាលពីថ្ងៃអាទិត្យ ទី១៦ ខែសីហា ឆ្នាំ២០២០ម្សិលមិញនេះ បានប្រមូលផ្តុំគ្នាធ្វើបាតុកម្មប្រឆាំងរដ្ឋាភិបាលជាថ្មីម្តងទៀត នៅឯវិមានប្រជាធិបតេយ្យក្រុងបាងកក ដោយទាមទារឲ្យមានកំណែទម្រង់នយោបាយ ។បាតុកម្មនេះដែរ រៀបចំឡើងដោយក្រុមចលនាយុវជន និងនិស្សិតប្រឆាំងរដ្ឋាភិបាល និងប្រជាធិបតេយ្យនិយមដែលមានឈ្មោះថា Free People។
ក្នុងសេចក្តីថ្លែងការណ៍របស់ក្រុមយុវជនខាងលើនេះ ទីភ្នាក់ងារព័ត៌មាន AFP បានចេញផ្សាយថា៖ «ការបំផុសគំនិតតែមួយគត់របស់ Free People គឺសេចក្តីសង្ឃឹម ក្នុងការសម្រេចឲ្យបាននូវប្រទេសថៃដែលមានរដ្ឋាភិបាលប្រជាធិបតេយ្យ ដោយមានរបបរាជានិយមអាស្រ័យរដ្ឋធម្មនុញពិតប្រាកដ»។
ក្នុងការតវ៉ានោះ ក្រុមបាតុករបានដាក់សំណើរទាមទារឲ្យរដ្ឋាភិបាលរបស់លោក ប្រាយុទ្ធ ចាន់អូចារ រំលាយរដ្ឋសភា វិសោធនកម្មរដ្ឋធម្មនុញ្ញនិងបញ្ឈប់ការបំពានដោយមន្ត្រីរដ្ឋាភិបាល។ បន្ថែមពីនេះ ក្រុមបាតុករក៏បានដាក់ចេញនូវលក្ខខណ្ឌផ្សេងទៀតចំនួន២ ដែលទាមទារមិនឲ្យមានរដ្ឋប្រហារយោធា និងមិនឲ្យមានរដ្ឋាភិបាលរួបរួមជាតិឡើយ។
បន្ថែមពីនេះទៅទៀត ក៏មានផងដែរការរទាមទារឲ្យមានកំណែទម្រង់របបរាជានិយមចំនួន១០ចំណុច ដែលរួមមានការកាត់បន្ថយអំណាចព្រះមហាក្សត្រ។ ក្រុមបាតុករបានទាមទាឲ្យបញ្ឈប់ការប្រើមាត្រា១១២ នៃក្រមព្រហ្មទណ្ឌថៃដែលដាក់ទោសដល់ទៅ១៥ឆ្នាំចំពោះអ្នកបរិហារ ប្រមាថ ឫគម្រាមព្រះមហាក្សត្រ មហាក្សត្រិយានី និងទាយាទ។
គួរបញ្ជាក់ថា បាតុកម្មនេះ ចាប់ផ្តើមនៅរសៀលថ្ងៃទី១៦ សីហា ដោយធ្វើការជួបជុំនៅជិតវិមានប្រជាធិបតេយ្យ ខណៈបាតុករចូលរួមនាំគ្នាឈរបន្តរហូតដល់រុក្ខវិថីRatchadamnoen។ បាតុកម្មនេះ ធ្វើឡើងអស់រយៈពេល៨ម៉ោង និងបានរំសាយនៅពេលយប់ដោយសន្តិវិធី ប៉ុន្តែលោក Tattep Ford Ruangprapaikitseree អ្នកដឹកនាំយុវជនបានអះអាងថា បើសិនជាគ្មានការកែប្រែពីរដ្ឋាភិបាលទាក់ទងនឹងការទាមទាររបស់ពួកគេត្រឹមខែកញ្ញាទេ គេនឹងពង្រីកសកម្មភាពរបស់គេ និងជួបជុំគ្នាជាថ្មីម្តងទៀតនៅវិមានប្រជាធិបតេយ្យ។
គួររំលឹកផងដែរថា មួយរយៈចុងក្រោយនេះ ក្រុមបាតុករបាននាំគ្នាតវ៉ាប្រឆាំងនឹងរដ្ឋាភិបាលថៃឡើងវិញ ដោយបានទាមទារឲ្យរំលាយរដ្ឋាភិបាលរបស់លោក ប្រាយុទ្ធ ចាន់អូចា ដែលបានឡើងកាន់អំណាចដំបូង តាមរយៈរដ្ឋប្រហារយោធាឆ្នាំ២០១៤។ មួយវិញទៀត ក្រុមសកម្មជនបានអះអាងថា ការបោះឆ្នោតសកលឆ្នាំ២០១៩ ដែលជាលើកដំបូងក្រោយរដ្ឋប្រហារ មិនមានភាពសុក្រឹត្យឡើយ ពោលគឺវាត្រូវបានលោក ប្រាយុទ្ធ រៀបចំរួចស្រេចដើម្បីធានាថា លោកនឹងនៅតែបន្តកាន់អំណាច៕ដោយ៖ស តារា
