ភ្នំពេញៈ ជនសង្ស័យម្នាក់បានធ្វើសកម្មភាពលួចម៉ូតូវីវ៉ាមួយគ្រឿងហើយបានបណ្ដើរម៉ូតូបំរុងយកទៅបញ្ចាំត្រូវកម្លាំងអាវុធហត្ថខណ្ឌដូនពេញឃាត់ខ្លួនបានភ្លាមៗតែម្តង ហេតុការណ៍នេះបានកើតឡើង កាលពីវេលាម៉ោង២១និង០០នាទីយប់ថ្ងៃទី០៤ ខែកុម្ភះ ឆ្នាំ២០១៦នៅចំណុចស្តុបផ្សារអូឬស្សី ស្ថិតក្នុងសង្កាត់បឹងរាំង ខណ្ឌដូនពេញ រាជធានីភ្នំពេញ។
ជនសង្ស័យដែលត្រូវកម្លាំងអាវុធហត្ថឃាត់ខ្លួនមានឈ្មោះ យ៉ុន វ៉ាន់នី ភេទប្រុស អាយុ៣៤ឆ្នាំ ស្នាក់នៅម្ដុំផ្សានាគមាស មានមុខរបរជាកម្មករលើកឥវ៉ាន់នៅផ្សាដើមគរ និងមានស្រុកកំណើតនៅភូមិទួលបាក់គាំ ឃុំជ្រៃវៀន ស្រុកព្រៃឈរ ខេត្តកំពង់ចាម។
បើតាមការរៀបរាប់របស់ជនសង្ស័យបានអោយដឹងថា ម៉ូតូដែលខ្លួនលួចម៉ាក វីវ៉ា ពណ៍ខ្មៅ ពាក់ស្លាកលេខ ភ្នំពេញ1AD-1480. ដោយខ្លួនបានលួចចេញពីខាងមុខសាលារៀនសុវណ្ណភូមិ តាមបណ្ដោយផ្លូវលេខ២០០ ក្នុងសង្កាត់បឹងរាំង ខណ្ឌដូនពេញ។ ដោយឃើញម៉ូតូបញ្ឈរទុកចោលដោយមិនមានចាក់សោរនៅខាងផ្ទះនិងមិនមានម្ចាស់នៅក៏ចូលទៅបណ្ដើរចេញបំណងយកទៅលក់នៅម្ដុំផ្សាអូឬស្សី។
មន្រ្តីអាវុធហត្ថបានអោយដឹងថានៅពេលដែលកម្លាំងកំពង់ជិះល្បាតក៏ឃើញជនសង្ស័យបណ្ដើរម៉ូតូមកដល់ចំណុចស្តុបផ្សាអូឬស្សីមានការសង្ស័យក៏ហៅស៊ួនាំតែពេលដែលហៅស៊ួជនសង្ស័យក៏ផ្ដួលម៉ូតូរត់តែត្រូវកម្លាំងដេញចាប់បានភ្លាមៗ។
ក្រោយមកកម្លាំងអាវុធហត្ថបាននាំជនសង្ស័យមកស៊ួនាំនៅមូលដ្ឋានកងរាជអាវុធហត្ថខណ្ឌដូនពេញដើម្បីចាត់ការតាមនិតិវុធីច្បាប់។ ចំណែកម៉ូតូកម្លាំងអវុធហត្ថយកទៅរក្សាទុកនៅមូលដ្ឋានកងរាជអាវុធហត្ថ ដើម្បីរងចាំស្រាវជ្រាវរកម្ចាស់មកយកទៅវិញផងដែរ៕ដោយៈ ព្រែកជ័យ
