ភ្នំពេញ ៖ បុរសម្នាក់បើករថយន្តក្រឡុកស៊ីម៉ងត៍លឿនពេកបានជ្រុលទៅបុកក្បាលនាគពុះចែកទ្រូងផ្លូវហើយខ្ទាតទៅប៉ះម៉ូតូមួយគ្រឿងបណ្ដាលឲ្យរងការខូចខាត ចំណែករថយន្តកល់ជាប់ទ្រូងផ្លូវទៅមុខលែងរួច។
ហេតុការណ៍នេះ បានកើតឡើងនៅវេលាម៉ោង ៩និង ២០នាទីយប់ថ្ងៃទី៥ ខែកញ្ញា ឆ្នាំ ២០២០ នៅតាមបណ្ដោយផ្លូវព្រះមុនីវង្ស ក្នុងសង្កាត់មនោរម្យ ខណ្ឌ៧មករា រាជធានីភ្នំពេញ។
ប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុគេឃើញបុរសម្នាក់ បើករថយន្តប្រភេទក្រឡុកស៊ីម៉ងត៍មួយគ្រឿងពាក់ស្លាកលេខ ភ្នំពេញ5A-0069 ធ្វើដំណើក្នុងទិសដៅពីលិចទៅកើតក្នុងល្បឿនលឿន ពេលមកដល់ចំណុចកើតហេតុ ក៏បួងចង្កូតជ្រុលទៅបុករបាំងថ្មពុះចែកផ្លូវ បាក់អស់មួយកង់ រួចក៏ខ្ទាតទៅប៉ះម៉ូតូហុងដាស៊េរី ឆ្នាំ២០២០មួយគ្រឿងទៀត បណ្តាលឲ្យរងការខូចខាត។សំណាងល្អនៅក្នុងហេតុការណ៍គ្រោះថ្នាក់ចរាចរណ៍នេះ មិនមានអ្នករងរបួសទេ ។
បន្ទាប់ពីកើតហេតុសមត្ថកិច្ចមូលដ្ឋាន ចុះមកដល់រួចក៏ទាក់ទងទៅខាងជំនាញចរាចរណ៍ឱ្យចុះមកយករថយន្តទៅរក្សាទុកនៅការិយាល័យចរាចរណ៍ផ្លូវគោក រង់ចាំដោះស្រាយគ្នានៅពេលក្រោយ៕ ដោយ៖ ជ្រោយពេជ្រ
