ខេត្តកណ្ដាល៖ ថវិកាមួយចំនួនព្រមទាំងអាវភ្លៀង ដែលជាអំណោយដ៏ថ្លៃថ្លារបស់ នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ ត្រូវបានលោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាលនាំយកទៅប្រគល់ជូនដល់មន្ត្រីនគរបាល នៃអធិការដ្ឋាននគរបាលស្រុកកណ្តាលស្ទឹង នៅរសៀលថ្ងៃទី១៨ ខែកញ្ញា ឆ្នាំ២០២០ ។
មន្ត្រីនគរបាល នៃអធិការដ្ឋាននគរបាលស្រុកកណ្តាលស្ទឹងមានចំនួន១៨០រូប ក្នុងនោះទទួលបានថវិកា៥០០០០រៀល និងអាវភ្លៀងចំនួន០១ក្នុងម្នាក់ៗ។ ដោយឡែកអធិការនគរបាលស្រុកទទួលបានម៉ូតូធំចំនួន០៥គ្រឿង ទុកសម្រាប់អោយមន្ត្រីជិះបំពេញការងារក្នុងមូលដ្ឋាន។
ឱកាសនោះដែរ លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្ដាល បានពាំនាំប្រសាសន៍ផ្តាំផ្ញើសាកសួរសុខទុក្ខពីសំណាក់ នាយឧត្តមសេនីយ៍សន្តិបណ្ឌិត នេត សាវឿន អគ្គស្នង ការនគរបាលជាតិ និងបានណែនាំឲ្យកងកម្លាំងនគរបាលទាំងអស់រក្សាសាមគ្គីភាពផ្ទៃក្នុង រួមគ្នាគិត រួមគ្នាធ្វើ ធ្វើអោយបងប្អូនប្រជាពលរដ្ឋក្នុងមូលដ្ឋានជឿរទុកចិត្ត និងអោយពួកគាត់រស់នៅក្នុងភាពសុខសានដោយមិនមានការភ័យខ្លាច ។ ក្រៅពីការងារជំនាញ និងបំរើសេវាសាធារណៈជូនបងប្អូនប្រជាពលរដ្ឋក្នុងមូលដ្ឋាន កងកម្លាំងទាំងអស់ត្រូវនាំគ្នាថែទាំសុខភាព អនាម័យខ្លួនប្រាណអោយបានស្អាតជានិច្ច ដើម្បីជៀសឆ្ងាយពីជម្ងឺផ្សេងៗ ពិសេសជម្ងឺកូវីត១៩។
សូមបញ្ជាក់ថា សកម្មភាពជួបសំណេះសំណាល និងចែកជូនថវិកា ព្រមទាំងអាវភ្លៀង ដែលជាអំណោយដ៏ថ្លៃថ្លារបស់ នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិនេះ ត្រូវបានលោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាលធ្វើឡើងចំនួន៣ស្រុករួចមកហើយ គឺនៅស្រុកល្វាឯម ស្រុកលើកដែក និងស្រុកពញាឮ។ ហើយលើកទី៤នេះធ្វើឡើងនៅស្រុកកណ្តាលស្ទឹង និងបន្តធ្វើទៀតរហូតគ្រប់១១ក្រុង/ស្រុកចំណុះឲ្យស្នងការដ្ឋាននគរបាលខេត្តកណ្តាល៕
ដោយ៖ សិលា
