អន្តរជាតិ៖ កាលពីថ្ងៃអាទិត្យទី២០ ខែកញ្ញាម្សិលមិញនេះ អាជ្ញាធរចិន បានរាយការណ៍ថា បានរកឃើញកូរ៉ូណាវីរុសនៅលើកញ្ចប់មឹកក្លាសេស្ថិតនៅក្នុងខេត្តជីលីន ប្រទេសចិន ដែលនាំចូលពីប្រទេសរុស្ស៉ី ។ ភ្លាមៗនោះដែរ អាជ្ញាធរសុខាភិបាលនៅតំបន់នោះ ក៏បានស្នើឲ្យប្រជាជនដែលបានទិញមឹកទាំងនោះយកបរិភោគ ត្រូវទៅធ្វើតេស្តដើម្បីស្វែងរកកូរ៉ូណាវីរុស។
អាជ្ញាធរសុខាភិបាលក្រុងហ្វូយូ ប្រាប់ទីភ្នាក់ងារព័ត៌មាន Reuters តាមបណ្តាញសង្គម WeChat ថា៖ អាជ្ញាធរសុខាភិបាលក្រុង ហ្វូយូ ខេត្តជីលីន បានប្រកាសថា រហូតដល់ថ្ងៃទី២០ ខែកញ្ញា ខ្លួនបានរកឃើញកូរ៉ូណាវីរុសនៅលើកញ្ចប់មឹកក្លាសេនាំចូលពីបរទេសជាថ្មីម្តងទៀត។ជាក់ស្តែងកញ្ចប់មឹកនោះ ត្រូវបាននាំមកពីទីក្រុងឆាងឈុន ដែលជាទីក្រុងធំរបស់ខេត្ត។
បើតាមអាជ្ញាធរចិន បានអះអាងថា កញ្ចប់មឹកនោះ នាំចូលមកពីរុស្ស៊ី ដោយក្រុមហ៊ុនមួយ នៅក្នុងក្រុងហ៊ុនឈុន និងត្រូវបានដឹកជញ្ជូនទៅក្រុងឆាងឈុន។ ពាក់ព័ន្ធនឹងការរកឃើញនេះ ចិន បានស្នើឲ្យប្រជាជនរបស់ខ្លួន ដែលបានទិញ និងបរិភោគមឹកចាប់ពីថ្ងៃទី២៤ ដល់ថ្ងៃទី៣១ខែសីហា ពីហាងលក់គ្រឿងសមុទ្រ Sanjia Deda នៅក្នុងក្រុងហ្វូយូ ត្រូវរាយការណ៍ទៅអាជ្ញាធរ ដើម្បីតាមដាន និងធ្វើតេស្តរកជំងឺCOVID-19 ។
ដោយឡែកសម្រាប់ចិន ប្រសិនបើរកឃើញកូរ៉ូណាវីរុស នៅលើកញ្ចប់ផលិតផលនាំចូលពីបរទេស ខ្លួននឹងផ្អាកការនាំចូលចំនួន ១សប្តាហ៍ហើយប្រសិនបើរកឃើញថាអ្នកផ្គត់ផ្គង់ផលិតផលទាំងនោះមានផ្ទុកCOVID-19 ចិន នឹងផ្អាកការនាំចូលផលិតផលទាំងនោះ ចំនួន១ខែ។ នេះបើតាមការបញ្ជាក់របស់មន្ត្រីពន្ធគយចិន នៅថ្ងៃទី១៨ ខែកញ្ញាកន្លងទៅ។
សូមជម្រាបថា កន្លងមក អាជ្ញាធរចិន បានរកឃើញកូរ៉ូណាវីរុសមានជាប់នៅលើកញ្ចប់គ្រឿងសមុទ្រក្លាសេ ដែលបាននាំចូលពីបរទេសនៅក្នុងទីក្រុងចំនួនពីរ។ ក្រោយមក ការរកឃើញកញ្ចប់ក្លាសេ ដែលមានជាប់កូរ៉ូណាវីរុស បានស្ងៀមស្ងាត់មួយរយៈ។ ព្រោះកាលពីសប្ដាហ៍មុន រដ្ឋបាលពន្ធគយចិន បានប្រកាសផ្អាកនាំចូលគ្រឿងសមុទ្រពីក្រុមហ៊ុន PT Putri Indahដែលជាក្រុមហ៊ុននាំចេញគ្រឿងសមុទ្រមួយរបស់ឥណ្ឌូណេស៊ី រយៈពេល ១សប្តាហ៍ បន្ទាប់ពីរកឃើញថា កញ្ចប់ដាក់ត្រីសមុទ្រមួយប្រភេទ មានកូរ៉ូណាវីរុស។ ជាការទទួលខុសត្រូវក្រសួងនេសាទឥណ្ឌូណេស៊ី ក៏បានប្រកាសផ្អាកការនាំចេញផលិតផលគ្រឿងសមុទ្ររបស់ក្រុមហ៊ុននេះ ទៅចិនផងដែរ ដើម្បីស៊ើបអង្កេតលើករណីមានកូរ៉ូណាវីរុសនេះ។
គួរបញ្ជាក់ថា បើគិតមកត្រឹមថ្ងៃទី២១ ខែកញ្ញា ឆ្នាំ២០២០នេះ ប្រទេសចិនមានករណីឆ្លងCOVID-19 សរុបចំនួន ៨៥២៩១ករណី អ្នកស្លាប់មានចំនួន ៤៦៣៤នាក់ និងអ្នកជាសះស្បើយមានចំនួន ៨០៤៨៤នាក់៕ដោយ៖ស តារា
