ខេត្តកំពង់ស្ពឺ៖ នៅថ្ងៃទី ៦ ខែកុម្ភៈ ឆ្នាំ ២០១៦ ណាហ្គាវើលបេះដូងសប្បុរសបានរៀបចំប្រារព្ធពិធីខួបកំណើតសម្រាប់លោកគ្រូអ្នកគ្រូនៅសាលាបឋមសិក្សាទឹកស្អុយ ស្ថិតក្នុងស្រុកសំរោងទង ខេត្តកំពង់ស្ពឺ។
លោក James Ma នាយកផ្នែកទំនាក់ទំនងបុគ្គលិក និងការងារសង្គមណាហ្គាវើល បានមានប្រសាសន៍ថា “ណាហ្គាវើលបេះដូងសប្បុរសតែងតែយកចិត្ដទុកដាក់ចំពោះសុខុមាលភាពកុមារកម្ពុជានិងការអភិវឌ្ឍវិស័យអប់រំនៅកម្ពុជា។ យើងលើកទឹកចិត្តកុមារឲ្យខិតខំសិក្សារៀនជាងមុនដើម្បីអនាគតភ្លឺស្វាងរបស់ពួកគេ។ ទោះបីជាយ៉ាងណាក៏ដោយ វាមិនអាចសម្រេចបានទេប្រសិនបើគ្មានការលះបង់ និងការប្តេជ្ញាចិត្តពីលោកគ្រូអ្នកគ្រូ។ លោកគ្រូអ្នកគ្រូគឺប្រៀបដូចជាទៀនដែលដុតបំភ្លឺជីវិតរបស់កុមារតាមរយៈការបង្ហាត់បង្រៀន និងការណែនាំ។ ដូច្នេះហើយយើងមិនគួរបំភ្លេចការខិតខំប្រឹងប្រែង និងការលះបង់របស់លោកគ្រូអ្នកគ្រូឡើយ។ ចេញពីក្នុងចិត្តរបស់យើងយើងសូមថ្លែងអំណរគុណដល់លោកគ្រូអ្នកគ្រូដែលបង្រៀនកុមារនិងបានគាំទ្រកម្មវិធីការងារសង្គមរបស់យើងអស់រយៈពេល២ឆ្នាំកន្លងមកនេះ។ យើងបានរៀបចំប្រារព្ធពិធីខួបកំណើតសម្រាប់លោកគ្រូអ្នកគ្រូនៅសាលាបឋមសិក្សាទឹកស្អុយ។ ការប្រារព្ធពិធីខួបកំណើតរបស់យើងសម្រាប់លោកគ្រូអ្នកគ្រូ គឺជាផ្នែកមួយនៃការដឹងគុណរបស់យើងចំពោះលោកគ្រូអ្នកគ្រូ ហើយយើងសង្ឃឹមថាពួកគាត់នឹងបន្តកិច្ចខិតខំប្រឹងប្រែង និងលះបង់សម្រាប់អនាគតភ្លឺស្វាងរបស់កុមារជាបន្តទៀត”។
លោកបានបន្ថែមទៀតថា “គោលបំណងនៃការប្រារព្ធពិធីខួបកំណើតនេះ គឺធ្វើជាគំរូដ៏ល្អមួយដល់សិស្សានុសិស្សឲ្យស្រឡាញ់និងយកចិត្ដទុកដាក់ចំពោះលោកគ្រូអ្នកគ្រូរបស់ពួកគេដែលបានណែនាំទាំងការសិក្សានិងជីវិតរស់នៅផងដែរ។ យើងបានធ្វើការវាយតម្លៃកម្មវិធីនេះ ដោយទទូលបាននូវការឆ្លើយតបវិជ្ជមាន។ណាហ្គាវើលបេះដូងសប្បុរសនឹងបន្តសកម្មភាពនេះដើម្បីលើកទឹកចិត្តលោកគ្រូអ្នកគ្រូនៅថ្ងៃអនាគត”។
លោក ជូតវុទ្ធីនាយកសាលាបឋមសិក្សាទឹកស្អុយ បានមានប្រសាសន៍ថា“ខ្ញុំពិតជាមានការភ្ញាក់ផ្អើលនិងរំភើបជាខ្លាំងនៅថ្ងៃនេះ។ ខ្ញុំស្ទើរតែស្រក់ទឹកភ្នែកពីព្រោះវាគឺជាលើកទីមួយសម្រាប់រូបខ្ញុំដែលមានគេប្រារព្ធខួបកំណើតឲ្យខ្ញុំនៅក្នុងមួយឆាកជីវិតនេះ។ ខ្ញុំបានភ្លេចថ្ងៃកំណើតរបស់ខ្ញុំបាត់ទៅហើយប៉ុន្តែណាហ្គាវើលបេះដូងសប្បុរសចងចាំវា។នោះបានឆ្លុះបញ្ចាំងអំពីការយកចិត្ដទុកដាក់របស់ណាហ្គាវើលបេះដូងសប្បុរសចំពោះពួកយើងទាំងអស់គ្នា។ ណាហ្គាវើលបេះដូងសប្បុរសមិនត្រឹមតែបានប្រារព្ធពិធីខូបកំណើតរបស់ខ្ញុំប៉ុណ្ណោះនោះទេប៉ុន្តែថែមទាំងជូនកាដូជាច្រើន និងនំខួបកំណើតសម្រាប់លោកគ្រូអ្នកគ្រូនិងសិស្សានុសិស្សទាំងអស់គ្នានៅទីនេះផងដែរ។ ថ្ងៃនេះគឺពិតជាថ្ងៃដ៏ពិសេសពិសាលណាស់សម្រាប់រូបខ្ញុំ។ ពួកគេបានច្រៀងចម្រៀងអបអរសាទរខួបកំណើតយ៉ាងពិរោះសម្រាប់រូបខ្ញុំ ដែលខ្ញុំមិនដែលបានឮនៅក្នុងជីវិតរបស់ខ្ញុំ”។
លោកបានបន្ថែមទៀតថា “យើងពិតជាមានសំណាងណាស់ដែលមានណាហ្គាវើលបេះដូងសប្បុរសនៅជាមួយយើង។ ខ្ញុំសូមថ្លែងអំណរគុណយ៉ាងជ្រាលជ្រៅចំពោះណាហ្គាវើលបេះដូងសប្បុរសសម្រាប់កិច្ចខិតខំប្រឹងប្រែងនិងការចូលរួមចំណែករបស់ពួកគេអស់រយៈពេល២ឆ្នាំកន្លងមកនេះ។ ខ្ញុំមិនអាចភ្លេចនូវរសជាតិដ៏ឈ្ងុយឆ្ងាញ់នៃនំខួបកំណើតនិងការប្រារព្ធពិធីនេះជារៀងរហូត។ ណាហ្គាវើលជាក្រុមហ៊ុនល្អបំផុតនៅក្នុងប្រទេសកម្ពុជាពីព្រោះណាហ្គាវើលចែករំលែកនូវភាពជោគជ័យរបស់ពួកគេជាមួយពួកយើងទាំងអស់គ្នាតាមរយៈកម្មវិធីការងារសង្គមដែលបានធ្វើឡើងដោយណាហ្គាវើលបេះដូងសប្បុរស”។
ស៊ុនមករាជាសិស្សថ្នាក់ទី ៦បាននិយាយថា “ខ្ញុំមិនដែលបានឃើញនំខួបកំណើតនៅក្នុងជីវិតរបស់ខ្ញុំទេ។ ការប្រារព្ធពិធីខួបកំណើតដែលបានរៀបចំឡើងដោយណាហ្គាវើលបេះដូងសប្បុរស គឺជាកម្មវិធីដ៏ល្អប្រសើរមួយ ហើយខ្ញុំសូមអរគុណដល់លោកគ្រូអ្នកគ្រូរបស់ខ្ញុំសម្រាប់ការបង្រៀននិងការណែនាំអប់រំរបស់ពួកគេ។ ថ្ងៃនេះយើងមានការសប្បាយចិត្តយ៉ាងខ្លាំងដែលបានញ៉ាំនំខួបកំណើតដ៏មានឱជារសយ៉ាងឆ្ងាញ់ដែលផ្ដល់ដោយណាហ្គាវើលបេះដូងសប្បុរស។ យើងស្រឡាញ់ណាហ្គាវើល” ៕
ដោយ៖ ស ដារ៉ា
