ភ្នំពេញ៖ យ៉ាងហោចណាស់មនុស្ស៣នាក់ បានរងរបួសធ្ងន់ស្រាយ ដោយសារម៉ូតូ២គ្រឿងបានបុកគ្នាចំពេញទំហឹង កាលពីវេលាម៉ោង៧ និង៣០នាទីព្រឹក ថ្ងៃទី១២ ខែកុម្ភៈ ឆ្នាំ២០១៦ តាមបណ្តោយផ្លូវសហព័ន្ធរុស្សី ត្រង់ចំណុចមុខដេប៉ូលក់ដែក និងគ្រឿងសំណង់ តាយ ធា ក្នុងភូមិព្រៃជីសាក់ សង្កាត់ចោមចៅ ខណ្ឌពោធិ៍សែនជ័យ។
សមត្ថកិច្ចបានឲ្យដឹងថា មុនពេលកើតហេតុ គេឃើញមានបុរស២នាក់ជិះម៉ូតូ១គ្រឿងម៉ាក ស្មាស់វី ពណ៌ខ្មៅ ពាក់ស្លាកលេខ ព្រៃវែង1F-8087 ធ្វើដំណើរតាមបណ្តោយផ្លូវខាងលើ។ លុះមកដល់ចំណុចកើតហេតុ ស្រាប់តែមានម៉ូតូ១គ្រឿងទៀតម៉ាកហុងដាឌ្រីម ស៊េរីឆ្នាំ២០១៣ ពណ៌ខ្មៅ ពាក់ស្លាកលេខ ភ្នំពេញ1BY-2994 ជិះតែម្នាក់ឯង
បើកចេញពីផ្លូវបេតុង ទិសដៅពីជើងទៅត្បូង ឆ្លងផ្លូវសហព័ន្ធរុស្សី ដោយគ្មានការប្រុងប្រយ័ត្ន ជាន់ហ្វ្រាំងមិនទាន់ ក៏ជ្រុលបុកម៉ូតូស្មាសចំពេញទំហឹង បណ្តាលឲ្យដួលគលើគ្នារងរបួសធ្ងន់២នាក់ និងស្រាលម្នាក់។
ប្រភពដដែលបានបន្ដថា អ្នកបើកម៉ូតូ ស្មាសវី ឈ្មោះ យ៉ឺន វ៉ាង ភេទប្រុស អាយុ២០ឆ្នាំ មុខរបរជាងជួសជុលម៉ាស៊ីនត្រជាក់ (រងរបួសស្រាល) និងអ្នករួមដំណើរឈ្មោះ ហោ ភេទប្រុស អាយុ២១ឆ្នាំ (រងរបួសធ្ងន់) ទាំង២នាក់ ស្នាក់នៅផ្ទះជួល សង្កាត់កាកាប ខណ្ឌពោធិ៍សែនជ័យ រីឯជនរងគ្រោះម្នាក់ទៀតមិនទានស្គាល់អត្តសញ្ញាណនៅឡើយទេ។
ក្រោយពេលកើតហេតុ ជនរងគ្រោះទាំង៣នាក់ ត្រូវបានរថយន្តសង្គ្រោះរបស់មន្ទីរពេទ្យបង្អែកពោធិ៍ចិនតុង ដឹកយកទៅ។ រីឯម៉ូតូទាំង ២គ្រឿង ត្រូវនគរបាលជំនាញ នៃអធិការដ្ឋាននគរខណ្ឌពោធិ៍សែនជ័យ យកទៅរក្សាទុក រង់ចាំដោះស្រាយពេលក្រោយបន្ត៕
ដោយ៖ វិបុល
