ម្ង៉ៃណោះ ខ្ញុំបាទបានធ្វើដំណើរឆ្លងកាត់ផ្លូវក្បែរសួនច្បារផ្សារចាស់ ចាប់ពីចំណុចមុខស្ថានីយរថភ្លើង រហូតដល់មាត់ទន្លេ ខ្ញុំបាទសង្កេតឃើញថា ផ្លូវសងខាងសួនច្បារនេះ ត្រូវបានហ៊ុំព័ទ្ធដោយហ្វូងរថយន្តដាក់តាំងលក់ស្ទើរតែមិនអាចធ្វើដំណើរដោយម៉ូតូ២គ្រឿងចៀសគ្នាបាននោះឡើយ ។ ខ្ញុំបាទមិននឹកស្មានថា កំណាត់ផ្លូវនៅកណ្តាលទីក្រុង បែរជាត្រូវជាប់សោរបស់ក្រុមអ្នកលក់រថយន្តយ៉ាងនេះសោះ ។
ក្នុងនាមប្រជាពលរដ្ឋម្នាក់ មិនដឹងថា តើអាជ្ញាធរខណ្ឌដូនពេញ ក៏ដូចជាសាលារាជធានីភ្នំពេញបានជ្រាបអំពីទិដ្ឋភាពនៅជុំវិញសួនច្បារនោះដែរ ឬយ៉ាងណាទេ ។ ឬមួយក៏ជាផែនការរបស់អាជ្ញាធរ ដែលបានផ្តល់ឱកាសឲ្យក្រុមអ្នកលក់រថយន្តយករថយន្តមកតាំងលក់បែបនេះឬ? បើយ៉ាងដូច្នេះមែន អាជ្ញាធរគួរតែហាមប្រាមអ្នកធ្វើដំណើរ ឬជូនដំណឹងចំពោះអ្នកធ្វើដំណើរទាំងអស់ឆ្លងកាត់កំណាត់ផ្លូវជុំវិញសួនច្បារនោះទេ ។
គេគួរតែរៀបចំសួនច្បារឲ្យក្លាយទៅជាកន្លែងកម្សាន្តសម្រាប់ប្រជាពលរដ្ឋហាត់ប្រាណផងដែរ ។ ប៉ុន្តែអ្វីដែលបាននិងកំពុងកើតឡើងនៅជុំវិញសួនច្បារផ្សារចាស់ ចាប់ពីផ្លូវព្រះមុនីវង្ស ដល់ផ្លូវព្រះស៊ីសុវត្ថិ វាក្លាយទៅជាចំណាប់ខ្មាំងរបស់ក្រុមអ្នកលក់រថយន្តនោះទៅវិញ ។ មិនតែប៉ុណ្ណោះ ផ្លូវនៅបរិវេណកន្លែងកម្សាន្តរបស់កុមារា កុមារី សួនកុមារវត្តភ្នំ ក៏ពោរពេញទៅដោយរថយន្តតាំងលក់ដែរ ៕
ដោយ៖ ប្រជាពលរដ្ឋម្នាក់
