អន្តរជាតិ៖ បន្ទាប់ពីមានពាក្យចចាមអារ៉ាមថា រដ្ឋាភិបាលថៃនឹងចាត់វិធានការទៅលើគ្រុប Facebook របស់បាតុករ ស្រាប់តែនៅថ្ងៃទី១៨ ខែតុលាថ្មីៗនេះ អ្នករៀបចំបាតុកម្មថៃ បានប្រាប់អ្នកចូលរួមរបស់ពួកគេឲ្យប្រើប្រាស់ប្រព័ន្ធ Telegram ដើម្បីទាក់ទងគ្នាវិញ សំដៅកាត់បន្ថយហានិភ័យពីការប្រើប្រាស់ប្រព័ន្ធទាក់ទងសព្វថ្ងៃដែលផ្ដោតលើ Facebook ។
ជាក់ស្តែងក្រុម Free Youth និង រណសិរ្សបង្រួបបង្រួមដើម្បី Thammasat និងបាតុកម្ម (UFTD) ដែលជាអ្នករៀបចំបាតុកម្មប៉ុន្មានថ្ងៃមកនេះ បានបង្ហោះនៅលើទំព័រ Facebook ថា៖ក្រសួងសេដ្ឋកិច្ច និងសង្គមឌីជីថល បានស្នើសុំរួចហើយក្នុងការលុបគេហទំព័ររបស់ពួកគេពីបណ្ដាញសង្គម Facebook ។នេះបើតាមការចេញផ្សាយរបស់កាសែត Bangkok Post ។
ក្រុម Free Youth បញ្ជាក់ទៀតថា ដើម្បីដោះស្រាយបញ្ហានេះ ក៏បានជំរុញឲ្យអ្នកតាមដានរបស់ខ្លួនប្តូរទៅប្រើ Telegram វិញ ដោយបានផ្តល់ការណែនាំអំពីរបៀបកំណត់ឯកជនភាព និងសុវត្ថិភាពនៅក្នុងកម្មវិធីដើម្បីលាក់លេខទូរស័ព្ទរបស់ពួកគេផងដែរ។ ចំណែកគេហទំព័រហ្វេសប៊ុករបស់ UFTD ក៏បានប្រកាសថា ខ្លួនកំពុងផ្លាស់ប្តូរទៅទំព័រFacebook ថ្មីមួយដែលមានឈ្មោះថា UFTD V.2 និងបានស្នើសុំឱ្យអ្នកតាមដានរបស់ខ្លួនទាក់ទងតាមរយៈ Telegram ផងដែរ។
ដោយឡែក លោក Buddhipongse Punnakanta រដ្ឋមន្ត្រីសេដ្ឋកិច្ច និងសង្គមឌីជីថលរបស់ថៃ ជុំវិញបញ្ហានេះដែរ លោក បានលើកឡើងថា រាល់ការសម្រេចចិត្តណាមួយក្នុងការបិទគេហទំព័ររបស់ក្រុមអ្នកតវ៉ា អាស្រ័យនៅនឹងប៉ូលិស ហើយចំណាត់ការបែបនោះ ក៏តម្រូវឱ្យមានការយល់ព្រមពីសំណាក់ម្ចាស់ Facebook ខ្លួនឯងផងដែរ។ រដ្ឋមន្រ្តីក្រសួងសេដ្ឋកិច្ចរូបនេះ បានបន្ថែមថា ក្រសួងមិនត្រូវបានទាក់ទងដោយប៉ូលីសពីចំណាតការបែបនេះទេ។
លោក Buddhipongse បានសង្កត់ធ្ងន់ថា៖ «ការស្នើសុំបិទ ជាធម្មតា ត្រូវការពេលវេលាច្រើនដើម្បីដំណើរការ ហើយក៏វាតម្រូវឱ្យមានដីការបស់តុលាការដើម្បីបន្តនីតិវិធីដែរ» ។ រដ្ឋមន្ត្រីរូបនេះ បានគូសបញ្ជាក់ថា ក្រសួងរបស់លោក មានកាតព្វកិច្ចរង់ចាំការស្នើសុំរបស់ប៉ូលិសជាផ្លូវការ ហើយនឹងពិចារណាការស្នើសុំការលុបគេហទំព័រហ្វេសប៊ុករបស់ Free Youth និង UFTD ណា ដែលបានផ្សព្វផ្សាយមាតិកាដែលត្រូវចាត់ទុកថា បានរំលោភលើក្រឹត្យបន្ទាន់ដែលបានដាក់ចេញពីសប្តាហ៍មុន។ក្រឹត្យបន្ទាន់ខាងលើ ដើម្បីរក្សាច្បាប់និងសណ្តាប់ធ្នាប់នៅចំពោះមុខការកើនឡើងនៃការតវ៉ានៅតាមដងផ្លូវ។
ដោយឡែកទាក់ទិននឹងករណីនេះដែរ អនុលេខាធិការអចិន្ត្រៃយ៍ក្រសួងសេដ្ឋកិច្ច និងសង្គមឌីជីថល លោក Phuchaphong Notthaisong ក៏បានអះអាងថា ក្រសួងលោកមិនមានសិទ្ធិអំណាចក្នុងការចាប់ផ្តើមដំណើរការនៃការបញ្ជូនសំណើលុបចោលទៅកាន់ Facebook នោះទេ។ប៉ុន្តែក្រសួងលោកអាចចាត់វិធានការតាមច្បាប់ប្រឆាំងឧក្រិដ្ឋកម្មកុំព្យូទ័រលើសកម្មភាពដែលខុសច្បាប់លើអ៉ីនធើណេត៕ដោយ៖ស តារា
