ភ្នំពេញៈ ចៅក្រមសាលាដំបូងរាជធានីភ្នំពេញលោកស្រី ស៊ លីនណា កាលពីរសៀលថ្ងៃទី១៥ ខែកុម្ភៈ ឆ្នាំ២០១៦ បានប្រកាសសាលក្រមផ្ដន្ទាទោសជនជាប់ចោទ សុខ ប៊ុន ដាក់ពន្ធនាគារ៣ឆ្នាំ និងពិន័យជាប្រាក់៦លានរៀល ហើយអនុវត្តទោសត្រឹម១០ខែប៉ុណ្ណោះ ដែលគេសង្ស័យថា អាចពាក់ព័ន្ធនិងទទួលសំណូកទើប ចៅក្រមប្រើឆន្ទានុសិទ្ធិសម្រេចបែបនេះ។
គួររំលឹកថា ជនត្រូវចោទរូបនេះ ការប្រើអំពើហិង្សាមកលើស្ត្រីរងគ្រោះគឺកញ្ញា សុជាតា ហៅ សាសា ដោយឃោឃៅយង់ឃ្នង តាមរយៈ ការវាយដំទាត់ធាក់ ចាប់សម្រាត បោចសក់ និងបញ្ជារឲ្យអង្គរក្សយកកាំភ្លើងបាញ់សម្លាប់ គឺធ្វើឲ្យមជ្ឃដ្ឋានមហាជនមើលឃើញថា ជនល្មើស សុខ ប៊ុន រងការរិះគន់ស្អប់ខ្ពើមយ៉ាងខ្លាំងពីមជ្ឃដ្ឋានប្រជាពលរដ្ឋ ពិសេសហេតុការណ៍នេះត្រូវបានគេបង្ហោះជាវីដេអូឃ្លីប បង្ហាញពីភាពដ៏កាចសាហាវនេះល្បីពេញផ្ទៃប្រទេស ក្នុុងនោះសូម្បីតែសម្ដេចតេជោ ហ៊ុន សែន ក៏បានអំពាវនាវឲ្យសមត្ថកិច្ចនិងស្ថាប័នតុលាការត្រូវចាត់វិធានការ ផ្ដល់យុត្តិធម៌សម្រាប់កញ្ញា សុជាតា ។
យោងតាមមាត្រា២១៨នៃក្រមព្រហ្មទណ្ឌបទ បង្កហិង្សាដោយចេតនាមានស្ថានទម្ងន់ ត្រូវផ្ដន្ទាទោសដាក់ពន្ធនាគារពី២ឆ្នាំទៅ៥ឆ្នាំនិងពិន័យជាប្រាក់ពី៤លានទៅ១០លានរៀល ប៉ុន្តែចៅក្រមសាលាដំបូងរាជធានីភ្នំពេញលោកស្រី ស៊ លីនណា ប្រកាសសាលក្រមផ្ដន្ទាទោសលើជនជាប់ចោទ សុខ ប៊ុន ដាក់ពន្ធនាគារ៣ឆ្នាំ និងពិន័យជាប្រាក់៦លានរៀល តែអនុវត្តទោសត្រឹម១០ខែប៉ុណ្ណោះ៕
ដោយ៖ សុខ ខេមរា
