ខេត្ដសៀមរាប៖ ក្រុមនារីៗចំនួន១៧នាក់ ដែលគេសង្ស័យថាលួចបំរើផ្លូវភេទ ជ្រកក្រោមស្លាកយីហោ ម៉ាស្សាកោសជប់ ត្រូវកម្លាំងការិយាល័យនគរបាលប្រឆាំងការជួញដូរមនុស្សនិងការពារអនីតិជននៃស្នងការដ្ឋាននគរបាលខេត្តសៀមរាបបានដឹកនាំកម្លាំងចុះធ្វើការប្រមូលយកទៅអប់រំ និងធ្វើកិច្ចសន្យាបញ្ឈប់ប្រព្រឹត្តតទៅទៀត។
ហេតុការណ៍នេះធ្វើឡើងនៅវេលាម៉ោង៩យប់ថ្ងៃទី១៤ខែកុម្ភះឆ្នាំ២០១៦ នៅតាមបណ្ដោយផ្លូវ ៣០ ស្ថិតនៅភូមិត្រពាំសេះ សង្កាត់គោកចក ក្រុង-ខេត្តសៀមរាប។
លោកស្រីវរសេនីយ៍ទោ ដួង ថាវរី នាយ ការិយាល័យនគរបាលប្រឆាំងការជួញដូរមនុស្សនិងការពារអនីតិជននៃស្នងការដ្ឋាននគរបាលខេត្តបានឲ្យដឹងថា ប្រតិបត្តិការនេះកម្លាំងចុះធ្វើការប្រមូលស្រ្តីរកស៊ីផ្លូវភេទដែលជ្រកក្រោមពាក្យថា កោសជប់ និងម៉ាស្សាហើយសមត្ថកិច្ចប្រមូលបានស្រ្តីចំនួន១៧នាក់ នៅទីតាំងចំនួន១០ ក្នុងនោះជនជាតិខ្មែរ ចំនួន១៣នាក់ និងជនជាតិវៀតណាមចំនួន០៤នាក់។
លោកវរសេនីយ៍ទោ ដួង ថាវរី បានបន្តឲ្យ ដឹងថាស្រ្តីខាងលើនេះនៅពេលយប់តែងតែធ្វើសកម្មភាពបក់ដៃហៅភ្ញៀវទេសចរណ៍ជាតិនិងអន្តរជាតិឲ្យចូលកន្លែងរបស់ខ្លួនដែលជាហេតុធ្វើខូចនូវសណ្ដាប់ធ្នាប់សាធារណៈនិងប្រពៃណីជាតិខែ្មរនិងតំលៃស្រ្តីខ្មែរផងដែរ។
លោកស្រីវរសេនីយ៍ទោបានបញ្ជាក់បន្ថែមទៀតថាស្រ្តីដែលកម្លាំងសមត្ថកិច្ចប្រមូលបានទាំង១៧នាក់នេះត្រូវបាននាំមកធ្វើការសាកសួរនៅស្នងការដ្ឋាននគរបាលខេត្តហើយបានធ្វើការអប់រំណែនាំនិងធ្វើកិច្ចសន្យាឲ្យបញ្ឈប់នៅសកម្មភាពដែលពួកគេបានធ្វើកន្លងមក។ បន្ទាប់ពីសួរនាំ រួចមកសមត្ថកិច្ចបានបញ្ជូនទៅ ធ្វើការអប់រំបន្ថែមទៀត៕
ដោយ៖ ជានិរន្ដរ៍
