អតីតអគ្គលេខាធិការអង្គការសហប្រជាជាតិ លោក Boutros Boutros-Ghali ដែលជាអ្នកដឹកនាំអង្គការសហប្រជាជាតិក្នុងយុគសម័យដ៏លំបាកលំបិននោះ បានទទួលមរណភាពរួចហើយកាលពីថ្ងៃទី១៦ ខែកុម្ភៈ ឆ្នាំ២០១៦ ស្ថិតនៅទីក្រុងកៃរ៉ូ ប្រទេសអេហ្ស៊ីប ក្នុងអាយុ៩៣ឆ្នាំ ។
អ្នកការទូតអេហ្ស៊ីបមកពីអាហ្វ្រិកបានក្លាយជាអគ្គលេខាធិការអង្គការសហប្រជាជាតិនៅក្នុងឆ្នាំ១៩៩២ ។ ប៉ុន្តែលោកបានបញ្ចប់តំណែងរបស់ខ្លួនយ៉ាងឆាប់រហ័សក្នុងរយៈពេល៥ឆ្នាំ ខណៈដែលអណត្តិទីពីររបស់លោកត្រូវអាមេរិកបោះឆ្នោតប្រឆាំងជំទាស់ ។
អគ្គលេខាធិការអង្គការសហប្រជាជាតិ លោកបាន គីមូន បានពិព័រណ៌នាថា លោក Boutros-Ghali ជាបុរសរដ្ឋ និងជាបញ្ញវន្តខាងច្បាប់អន្តរជាតិ ដែលបាននាំមកនូវបទពិសោធន៍យ៉ាងធំធេង និងអំណាចបញ្ញាដល់ការងាររបស់ស្ថាប័នកំពូលមួយនេះ ។ បេសកកម្មរបស់លោក Boutros-Ghali មិនត្រូវបានកត់សម្គាល់ឃើញថា មានកំហុសនោះឡើយ ។
លោក Boutros-Ghali ជាអតីតជារដ្ឋមន្ត្រីក្រសួងការបរទេសអេហ្ស៊ីប និងជាអ្នកការទូតជើងចាស់ដែលដឹកនាំអង្គការសហប្រជាជាតិអំឡុងពេលដ៏សែនលំបាកក្នុងបញ្ហាវិបត្តិនៅក្នុងប្រទេសស៊ូម៉ាលី រ្វ៉ាន់ដា មជ្ឈិមបូព៌ា និងអតីតរដ្ឋយ៉ូហ្គោស្លាវី ។
ប្រធានាធិបតីបារាំង លោក Francois Hollande បានផ្ញើសារចូលរួមរំលែកទុក្ខ និងការសោកស្តាយចំពោះមរណភាពរបស់លោក Boutros-Ghali ។ លោក Hollande បានបញ្ជាក់ថា លោក Boutros-Ghali ជាពលរដ្ឋអេហ្ស៊ីបដ៏អស្ចារ្យ និងជាអ្នកដឹកនាំដ៏ឆ្នើមរបស់ស្ថាប័នអង្គការសហប្រជាជាតិ ដែលបានបំពេញភារកិច្ច តួនាទីរបស់ខ្លួនដោយមិនខ្លាច នឿយហត់ដើម្បីជ្រោង លើកស្ទួយដល់សន្តិភាព និងការពារជម្លោះកុំឲ្យកើតមានទូទាំងពិភពលោក ។ សាររបស់លោក Hollande នៅពេលនេះជាការបំផុសគំនិតដល់សហគមន៍អន្តរជាតិក្នុងទិសដៅការពារ និងរក្សាសន្តិភាព ខណៈដែលតំន់មជ្ឈិមបូព៌ាត្រូវគេមើលឃើញថា បាននិងកំពុងកើតមានសោកនាដកម្មថ្មីមួយនោះ ៕
ប្រែសម្រួល៖ ថាច់ យ៉ាត