តបតាមការអញ្ជើញរបស់លោកប្រធានាធិបតីសហរដ្ឋអាមេរិក បារ៉ាក់ អូបាម៉ា ប្រមុខនៃរាជរដ្ឋាភិបាលកម្ពុជា សម្តេច ហ៊ុន សែន បានអញ្ជើញចូលរួមក្នុងកិច្ចប្រជុំកំពូលពិសេសអាស៊ាន-សហរដ្ឋ អាមេរិក ចាប់ពីថ្ងៃទី១៥-១៦ ខែកុម្ភៈ ឆ្នាំ២០១៦ នៅមជ្ឈមណ្ឌល Sunnylands ក្នុងទីក្រុង Rancho Mirage រដ្ឋកាលីហ្វ័រញ៉ាសហរដ្ឋអាមេរិក។
នេះជាជោគជ័យថ្មីមួយទៀតរបស់រាជរដ្ឋាភិបាល ដែលដឹកនាំដោយគណបក្សប្រជាជនកម្ពុជា នៅលើឆាកអន្តរជាតិ។ ភាពស្មើមុខ ស្មើមាត់ និងស្មើសិទ្ធិគ្នាទាំងនៅក្នុងតំបន់ និងក្នុងពិភពលោកនេះ បានបញ្ជាក់យ៉ាងច្បាស់ថា ព្រះរាជាណាណាចក្រកម្ពុជាត្រូវបានទទួលស្វាគមន៍ដោយប្រទេសមហាអំណាច ក្នុងនាមជាប្រទេសមួយ ដែលបានប្រកាន់យកនូវដំណើរការនៃលទ្ធិប្រជាធិបតេយ្យ សេរីពហុបក្ស និងការគោរពសិទ្ធិមនុស្ស យ៉ាងខ្ជាប់ខ្ជួន បើទោះបីជាគណបក្សសង្រ្គោះជាតិ និងក្រុមសង្គមស៊ីវិលដែលមាននិន្នាការប្រឆាំងនៅក្នុងប្រទេស ខំបំភ្លៃការពិតថាមានការរំលោភសិទ្ធិមនុស្សធ្ងន់ធ្ងរ ឬដំណើរការនៃលទ្ធីប្រជាធិបតេយ្យដើរថយក្រោយយ៉ាងណាក៏ដោយនោះ។
ដំណើរទស្សនៈកិច្ចជាផ្លូវការនេះ បានបង្ហាញឲ្យឃើញកាន់តែច្បាស់ពីការពង្រីកកិច្ចសហប្រតិបត្តិការលើវិស័យសេដ្ឋកិច្ចឲ្យបានកាន់តែប្រសើរជាងមុន ពិសេសធ្វើយ៉ាងណាឲ្យទំហំពាណិជ្ជកម្មនៃប្រទេសទាំងពីរមានការកើនឡើង និងជាពិសេសគឺការណែនាំឲ្យមានអ្នកវិនិយោគទុនរបស់សហរដ្ឋអាមេរិក មកធ្វើការវិនិយោគក្នុងប្រទេសកម្ពុជាកាន់តែមានការកើនឡើងទ្វេដងថែមទៀត។
ជាលទ្ធផលផ្លែផ្កា មេដឹកនាំទាំងអស់នៅក្នុងកិច្ចប្រជុំពិសេសនេះបានព្រមព្រៀងគ្នា ដោយសម្រេចបាននូវសេចក្តីថ្លែងការណ៍រួមមួយ ដែលបានដាក់បញ្ចូលទាំងការបន្តកិច្ចសហប្រតិបត្តិការសេដ្ឋកិច្ច ការលើកកម្ពស់នីតិរដ្ឋ និងបញ្ហាប្រឈមរបស់សកលលោកពេលបច្ចុប្បន្ននេះ។
ទាក់ទិននឹងការជំរុញសេដ្ឋកិច្ចនេះ មេដឹកនាំអាមេរិក-អាស៊ាន ក៏បានទទួលស្គាល់នូវសារៈសំខាន់ ក្នុងការបង្កើតនូវគោលនយោបាយ ដែលនាំដល់ការបើកចំហការប្រកួតប្រជែងខាងសេដ្ឋកិច្ច។ គោលនយោបាយនេះ នឹងជួយជំរុញកំណើនសេដ្ឋកិច្ច ការបង្កើនការងារដល់ប្រជាពលរដ្ឋ ព្រមទាំងជួយដល់សហគ្រាសធុនតូច និងមធ្យម ក៏ដូចជាបង្រួមគម្លាតអភិវឌ្ឍន៍រវាងគ្នាផងដែរ។
កិច្ចទទួលស្វាគមន៍យ៉ាងកក់ក្តៅដោយលោកប្រធានាធិបតីសហរដ្ឋអាមេរិកលើកនេះ ចំពោះសម្តេច ហ៊ុន សែន ហាក់ដូចជាព្រនង់មួយសំពងយ៉ាងធ្ងន់ធ្ងរទៅដល់គណបក្សសង្គ្រោះជាតិ ក៏ដូចជាក្រុមសង្គមស៊ីវិលមួយចំនួនតូច ដែលពួកគេតែងតែមើលមិនឃើញពីកិច្ចខិតខំប្រឹងប្រែងកសាង និងអភិវឌ្ឍប្រទេសរបស់រាជរដ្ឋាភិបាល ហើយតែងតែរិះគន់នូវចំណុចអវិជ្ជមានបន្តិបន្តួចនៅក្នុងសង្គម។
ប្រសិនបើការដឹកនាំរបស់សម្តេច ហ៊ុន សែន ពិតជាអាក្រក់ដូចការលើកឡើងរបស់ក្រុមប្រឆាំងទាំងនោះមែននោះ ចុះហេតុអ្វីបានជាប្រទេសមហាអំណាចនានានៅលើពិភពលោក និងប្រទេសនៅក្នុងតំបន់ រួមទាំងអង្គការនានារបស់អង្គការសហប្រជាជាតិយល់ព្រមចាប់ដៃធ្វើកិច្ចសហប្រតិបត្តិការ ទាំងផ្នែកសេដ្ឋកិច្ច សន្តិសុខ និងទាំងផ្នែកសុខាភិបាល ជាមួយសម្តេច ហ៊ុន សែន?
ដូច្នេះ សច្ចៈធម៌ និងយុត្តិធម៌ នៃភាពត្រឹមត្រូវក្នុងការដឹកនាំប្រទេសរបស់រាជរដ្ឋាភិបាល គឺត្រូវបានវិនិឆ្ឆ័យដោយអន្តរជាតិ ហើយអំពើអយុត្តិធម៌ ដែលកើតឡើងពីការបំពុល បំភ្លៃការពិត នៃក្រុមប្រឆាំងគឺត្រូវបានបកអាក្រាត ព្រមទាំងបានផ្តល់នូវភាពអាម៉ាស់ចំពោះពួកគេវិញជាក់ជាមិនខាន៕
ដោយ៖ ពង្ស សុក្រឹត្យ
