អន្តរជាតិ៖ បើតាមការចុះផ្សាយរបស់កាសែត Nikkei Asia នៅថ្ងៃទី៩ ខែធ្នូ ឆ្នាំ២០២០ម្សិលមិញនេះថា អាមេរិក នឹងលក់យន្តហោះចម្បាំងពីរប្រភេទមាន F-15 និង F-18 ឲ្យឥណ្ឌូណេស៊ី ដើម្បីពង្រឹងកងកម្លាំងទ័ពអាកាសក្នុងការការពារតំបន់សមុទ្រ ដែលត្រូវបានចិនបញ្ជូនទូកនេសាទ និងទូកល្បាតចូលមកជាញឹកញាប់។
លោក Christopher Miller រដ្ឋមន្ត្រីស្ដីទីក្រសួងការពារជាតិអាមេរិក បានធ្វើទស្សនកិច្ចនៅទីក្រុងហ្សាការតានៅថ្ងៃទី៧ និង៨ ខែធ្នូកន្លងទៅ បានជួបជាមួយរដ្ឋមន្ត្រីការពារជាតិឥណ្ឌូណេស៊ី លោក Prabowo Subianto ដែលថ្មីៗនេះ ត្រូវបានអាមេរិកលុបចោលបម្រាមចូលទៅក្នុងទឹកដីអាមេរិក។
ភាគីអាមេរិក ក្នុងជំនួបមន្ត្រីជាន់ខ្ពស់នេះ ក៏បានសម្រេចលក់យន្តហោះចម្បាំងចំនួន ពីរប្រភេទគឺ F-15 និង F-18 ឲ្យឥណ្ឌូណេស៊ី ស្របពេលប្រទេសអាស៊ីអាគ្នេយ៍មួយនេះ ចង់អភិវឌ្ឍសមត្ថភាពកងកម្លាំង F-15 របស់ខ្លួន។ ជាមួយគ្នានេះ លោក Miller និង លោក Prabowo ក៏បានជជែកពីបញ្ហាសមុទ្រចិនខាងត្បូងផងដែរ ដែលចិនកំពុងធ្វើសកម្មភាពយ៉ាងខ្លាំងតាមរយៈការធ្វើយោធូបនីយកម្មនៅក្នុងតំបន់សមុទ្រជម្លោះ។
ជាក់ស្តែងឥណ្ឌូណេស៊ី កន្លងមកបានជំរុញយ៉ាងខ្លាំងឲ្យអាមេរិក លក់យន្តហោះចម្បាំងប្រភេទ F-15, F-18 និង F-35 ដល់ខ្លួន។ ប៉ុន្តែអាមេរិក យល់ព្រមលក់យន្តហោះចម្បាំងប្រភេទ F-15 និង F-18 នៅពេលនេះ ខណៈយន្តហោះចម្បាំងប្រភេទ F-35 អាចរងចាំរហូតដល់១០ឆ្នាំ ឯណោះក្នុងការដឹកជញ្ជូនមកឥណ្ឌូណេស៊ី។ F-15 និង F-18 ត្រូវបានផលិតដោយក្រុមហ៊ុនអាមេរិក McDonnell Douglas និងក្រុមហ៊ុន Boeing ។
ម្យ៉ាងទំនាក់ទំនងទ្វេភាគីនេះ ក៏អាចរុញចិនឲ្យឈរនៅលើមាត់ជ្រោះផងដែរ។ ខណៈការរឹតចំណងទំនាក់ទំនងទ្វេភាគីនេះ ទំនងជាចង់ទប់ស្កាត់ឥទ្ធិពល និងអំណាចរបស់ចិននៅក្នុងតំបន់អាស៊ីអាគ្នេយ៍ ក៏ដូចជានៅក្នុងសមុទ្រចិនខាងត្បូង។
សូមជម្រាបថា នៅឥណ្ឌូណេស៊ី លោក Miller ក៏បានជួបជាមួយមេបញ្ជាការកងទ័ពជើងគោកឥណ្ឌូណេស៊ី លោក Hadi Tjahjanto ផងដែរ ដើម្បីជជែកពីការហឹកហាត់កងទ័ពរួមគ្នា។ បើតាមសេចក្តីប្រកាសព័ត៌មានរបស់ស្ថានទូតអាមេរិកប្រចាំនៅឥណ្ឌូណេស៊ី លោក Miller បានបញ្ជាក់ពីតួនាទីដ៏សំខាន់របស់ក្រសួងការពារជាតិអាមេរិក ជាមួយឥណ្ឌូណេស៊ី ក្នុងការការពារគោលការណ៍ «សេរី និងបើកចំហ» នៅក្នុងសមុទ្រចិនខាងត្បូង ក៏ដូចជានៅក្នុងតំបន់អាស៊ី-បាស៊ីហ្វិក។
គួររម្លឹកដែរថា លោ កប៉ៃ ប៉ុមប៉េអូ ប្រមុខការទូតអាមេរិក នៅចុងខែតុលាកន្លងទៅ ក៏បានធ្វើទស្សនកិច្ចមកឥណ្ឌូណេស៊ីដែរ។ ការការពារប្រជុំកោះណាទុណា ពាណិជ្ជកម្ម និងបញ្ហាសមុទ្រចិនខាងត្បូង នៅតែជារបៀបវារៈសំខាន់ក្នុងការរឹតចំណងទំនាក់ទំនងទ្វេភាគី៕ដោយ៖ស តារា
