អន្តរជាតិ៖ តាំងតែពីដើមឡើយសហរដ្ឋអាមេរិក បានអះអាងថា ទំបន់វារីអគ្គិសនីរបស់ចិនប៉ះពាល់បរិស្ថាន និងលំហូរទឹកសម្រាប់ប្រទេសនៅផ្នែកខាងក្រោម។ ស្រាតែនៅថ្ងៃទី១៣ ធ្នូថ្មីៗនេះ អាមេរិក បានដាក់ចេញនូវគម្រោងដែលប្រើប្រាស់ផ្កាយរណបក្នុងការកត់ត្រា និងចេញផ្សាយទិន្ន័យ ស្តីពីកម្ពស់ទឹកនៅក្នុងទំនប់វារីអគ្គិសនីទាំងអស់របស់ចិន។ ចំពោះការបញ្ចេញគម្រោងថ្មីនេះ អាចនឹងឈានទៅដល់ការប្រឈមមុខថ្មីមួយទៀតក្នុងអនុតំបន់នេះ។
បើយោងតាមទីភ្នាក់ងារព័ត៌មាន Reuters បានចុះផ្សាយថា គម្រោងដែលមានឈ្មោះMekong Dam Monitor ទទួលមូលនិធិមួយផ្នែកពីក្រសួងការបរទេសអាមេរិក។ គម្រោងនេះ នឹងប្រើផ្កាយរណបក្នុងការកត់ត្រាកម្ពស់ទឹក ក្នុងទំនប់វារីអគ្គិសនីចិន និងប្រទេសឯទៀត។
សូមជម្រាបថា ផ្នែកមួយនៃគម្រោងនេះ នឹងបង្ហាញពីកម្រិតភាពសើមនៃផ្ទៃខាងលើ ដែលបង្ហាញពីតំបន់ដែលសើមជាង ឬស្ងូតជាងកម្រិតធម្មតា។ ការបង្ហាញនេះ នឹងនាំឲ្យគេដឹងពីលំហូរទឹកត្រូវបានកែប្រែ ដោយទំនប់វារីអគ្គីសនីដោយកម្រិតណា។ ខណៈដែលទិន្ន័យខាងលើនេះក៏នឹងត្រូវផ្សាយផ្ទាល់ និងអាចចូលមើលជាសាធារណៈផងដែរ។
ទាក់ទិននឹងបញ្ហាខាងលើ កន្លងមក ចិនបដិសេធរាល់ការស្រាវជ្រាវទាំងឡាយណារបស់អាមេរិក ដែលបង្ហាញថាទំនប់វារីអគ្គិសនីរបស់ចិន ធ្វើឲ្យប៉ះពាល់ដល់ប្រទេសនៅភាគខាងក្រោមខ្លួន ដែលមានប្រជាជនប្រមាណ៦០លាននាក់រស់នៅ អាស្រ័យផលនឹងទន្លេមេគង្គ ក្នុងរបរកសិកម្ម និងនេសាទ។
ប្រធានមជ្ឈមណ្ឌល Stimson លោក Brian Eyler ដែលកាន់កាប់គម្រោងខាងលើអះអាងថា ការឃ្លាំមើលកម្រិតទឹកនេះ នឹងបង្ហាញភស្តុតាងថា ទំបន់វារីអគិគីសនីទាំង១១របស់ចិន ដំណើរការក្នុងលក្ខណៈមួយដ៏ទំនើប ដើម្បីទាញយកថាមពលលក់ជាអតិបរមាសម្រាប់ខេត្តភាគខាងកើតរបស់ខ្លួន ដោយមិនពិចារណាពីផលប៉ះពាល់ដល់លំហូរទឹកខាងក្រោមឡើយ។
ដោយឡែកភាគីចិន ក៏បានអះអាងថា ទំបន់វារីអគ្គិសនីនេះផ្តល់ផលវិជ្ជមាន។ វិទ្យាស្ថានវិស្វកម្មថាមពលកកើតឡើងវិញរបស់ចិន លើកឡើងថា ទឹកដែលស្តុកក្នុងទំនប់វារីអគ្គិសនីក្នុងខែវស្សា ជួយបង្ការមិនឲ្យទឹកជំនន់ និងគ្រោះរាំងស្ងួត។ របាយការណ៍របស់វិទ្យាស្ថានដែលចុះផ្សាយនៅថ្ងៃទី៤ ធ្នូបានសង្កត់ធ្ងន់ថា ការស្រាវជ្រាវរបស់អាមេរិក ពុំដែលផ្តល់ភស្តុតាងគ្រប់សព្វឡើយ។
គួរបញ្ជាក់ថា នាដើមខែវិច្ឆិកា ឆ្នាំ២០២០កន្លងទៅ ទន្លេមេគង្គនេះ ចិនយល់ព្រមក្នុងការចែករំលែកទិន្ន័យទឹក ជាមួយគណៈកម្មការទន្លេមេគង្គ(MRC)។ MRC មានតួនាទីផ្តល់យោបល់ដល់ប្រទេសថៃ កម្ពុជា ឡាវ និងវៀតណាម ដែលជាសមាជិកក្នុងការអភិវឌ្ឍ និងថែទាំទន្លេដែលមានប្រវែង ៤,៣៥០គីឡូម៉ែត្រនេះ។
ជុំវិញបញ្ហានេះដែរ តាមពិតទៅចិន និងអាមេរិកមានស្ថាប័នរៀងៗខ្លួន ក្នុងការប្រកួតប្រជែងគ្នាក្នុងទន្លេមេគង្គ។ ចិន មានកិច្ចសហប្រតិបត្តិការមេគង្គ-ឡានឆាង។ ចំណែកអាមេរិក មានភាពជាដៃគូមេគង្គ-អាមេរិក៕ដោយ៖ស តារា
