កាលពីថ្ងៃទី១៥ខែធ្នូ កម្លាំងប៉ូលិសបារាំង បានប្រកាសថា បានរកឃើញ នឹងរឹបអូស អាវុធ គ្រាប់រំសេវ ជាងមួយតោន បន្សល់តាំងពីសម័យសង្គ្រាមលោកលើកទីពីរ។ ការរកឃើញគឺស្ថិតនៅតំបន់ ភាគអាគ្នេយ៍នៃប្រទេសនេះ។
មន្ត្រីប៉ូលិសបារំាង បានឲ្យដឹងថា នៅក្នុងការឆែកឆេរនៅទីក្រុង Annecy ប៉ូលិសក៏បានរកឃើញគ្រាប់រំសែវ ជាង ១តោន ក្នុងនោះមានកាំភ្លើងបាញ់សត្វ កាំភ្លើងស្វ័យប្រវត្ត និងគ្រាប់រំសេវជាង ៣០០គីឡូក្រាម ដែលបានរក្សាទុកនៅក្នុង ហ្គារ៉ាស់ឡាន ។ ជាមួយគ្នានោះកម្លាំងសន្តិសុខក៏បានរកឃើញឧបករណ៍សម្រាប់ផលិតអាវុធផងដែរ។
កម្លាំងប៉ូលិសក៏បានឃាត់ខ្លួនបុរសវ័យ២០ឆ្នាំដោយសង្ស័យពីការជួញដូរអាវុធ។ តាមការលើកឡើងរបស់កម្លាំងប៉ូលិស ចំនួនអាវុធខាងលើ ជារបស់អ្នកដែលលក់អាវុធ និងមានចំណូលចិត្តរក្សាទុកអាវុធបន្សល់ពីសម័យសង្គ្រាមលោកលើកទីពីរ។
ការរកឃើញអាវុធខាងលើ កើតឡើងក្នុងពេលដែលបារាំង រិតបន្តឹង សន្តិសុខ ទប់ស្កាត់ការវាយប្រហារ កើតឡើងនៅក្នុងប្រទេសនេះ ។ កន្លងមក បារាំងប្រឈម ការវាយប្រហារជាបន្តបន្ទាប់ពីក្រុមភេរវករ ដែលលាក់ខ្លួនក្នុងទឹកដីបារាំង ហើយការវាយប្រហារភាគច្រើនប្រើកាំបិត៕
រូបភាព៖ thespuzz.com
