ភ្នំពេញ៖ ការត្រៀមរៀបចំព្រឹត្តិការណ៍ប្រណាំងម៉ូតូលើដំបូងនៅកម្ពុជា ក្នុងគោលបំណងចង់ទទួលបានការគាំទ្រ ពីមហាជនហើយក៏ចូលរួមចំណែកអប់រំច្បាប់ចរាចរណ៍ផ្លូវគោកថ្មី ដល់យុវជនស្រលាញ និងកំពុងប្រើប្រាស់ម៉ូតូធំៗយល់ដឹងពីរបៀបជិះម៉ូតូជាលក្ខណៈបច្ចេកទេស ជៀសវាងភាពអនាធិបតេយ្យតាមផ្លូវសាធារណៈ នេះបើតាមការលើកឡើងរបស់ លោក សូ សុជាតិ អគ្គលេខាធិការសហព័ន្ធកីឡាយានយន្តកម្ពុជា ក្នុងសន្និសីទសារព័ត៌មាននារសៀលថ្ងៃទី១៩ ខែកុម្ភៈ ឆ្នាំ២០១៦ កន្លងទៅ ។
លោកអគ្គលេខាធិការ បានឲ្យដឹងថា ព្រឹត្តការណ៍ប្រណាំងម៉ូតូនេះមានលក្ខណៈបើកទូលាយមួយដែលមានទាំងកីឡាករកីឡាការិនីក៏អាចចុះឈ្មោះចូលរួមប្រកួតបានដោយគ្រាន់តែបំពេញលក្ខខណ្ឌឲ្យបានត្រឹមត្រូវប៉ុណ្ណោះអ្នកដែលនិយមចូលចិត្តជិះម៉ូតូធំៗនឹងទទួលបានសិទ្ធិប្រណាំងនៅលើផ្លូវរាបស្មើក្នុង
បរិវេណមជ្ឈមណ្ឌលកម្សាន្តកោះពេជ្រនាថ្ងៃទី២៦-២៧ខែមិនាឆ្នាំ២០១៦ខាងមុខ ។
លោកសូ សុជាតិ បានបន្តទៀតថា ការប្រណាំងម៉ូតូលើកដំបូង យើងមានគោលបំណងបង្កើតកម្មវិធីនេះឡើងដើមទាក់ទាញយុវជនឲ្យចូលរួមជិះតាមលក្ខណៈស្តង់ដាបច្ចេកទេសព្រមទាំង ឆ្លៀតឱកាសនោះអប់រំច្បាប់ចរាចរណ៍ដែលជាផ្នែកមួយអភិវឌ្ឍវិស័យកីឡាប្រណាំងម៉ូតូនៅកម្ពុជាឲ្យរីចម្រើនម្យ៉ាវិញទៀតព្រឹត្តិការណ៍នេះក៏មានកីឡាករកីឡាការិនីមកពីប្រទេសវៀតណាមនិង ថៃចូលរួមផងដែរ។សហព័ន្ធកីឡាយានយន្ដកម្ពុជា និង ទីភ្នាក់ងារៀបចំកីឡាប្រណាំងយានយន្ដកម្ពុជាដែលមានឈ្មោះជាភាសាអង់គ្លេសថា Kampuchea Autosport Racing Agency (KARA) បានបង្កើតឡើងកាលពីពាក់កណ្ដាលឆ្នាំ២០១៤កន្លងទៅ ។
តំណាងសហព័ន្ធកីឡាយានយន្ដកម្ពុជានិងKARAសុទ្ធតែបានលើកឡើងស្រដៀងគ្នាថា ការបង្កើតកម្មវិធីនេះឡើងគោលដៅគឺចង់អភិវឌ្ឍវិស័យកីឡាភាពសប្បាយរីករាយហើយបានរួមចំណែកអប់រំច្បាប់ចរាចរដល់ដល់អ្នកចូលរួមពិសេសអ្នកដែលចូលចិត្តជិះម៉ូតូធំឲ្យចូលរួមប្រកួតក្នុងក្របខ័ណ្ឌកីឡាប្រសើរជាងការបង្កើតភាពអានាធិបតេយ្យលើដងផ្លូវសាធារណៈ នេះក៏ជាការបង្កើនការយល់ដឹងពីបច្ចេកទេសបើកបរ និងបច្ចេកទេសក្នុងការប្រើប្រាស់យានយន្ដផងដែរ។
តំណាងKARA បានឲ្យដឹងថា ការប្រណាំងនេះចែកចេញជា ៥ វិញ្ញាសាគឺទី១-វិញ្ញាសាសម្រាប់ប្រភេទម៉ូតូកែឆ្នៃដែលមានស៊ីឡាំងក្រោម១៣៥សេសេទី២-ម៉ូតូអំប្រីយ៉ា(Manual Cluth) ១២៥ ទៅ១៣៥សេ សេ ទី៣-ម៉ូតូប្រភេទចង្កឹះលេខ (Semi Auto)១១០ សេ សេ ទៅ១២៥សេ សេ ទី៤-ម៉ូតូប្រភេទលេខអូតូ១២៥សេ សេ និងទី៥-ម៉ូតូប្រភេទប្រភេទអូតូ១១០ សេ សេ ដល់១១៥ សេ សេ។អ្នកដែលអាចចូលរួមប្រណាំងបានត្រូវមានអាយុចាប់ពី១៦ឆ្នាំឡើងទៅ ហើយ ការប្រណាំងធ្វើលើផ្លូវចម្ងាយ៨៣០ម៉ែត្រ(ក្នុងមួយជុំ)ព្រមទាំងមានផ្លូវកោង និង កែង ចំនួន ១០កន្លែង ៕
ដោយ៖ សារីម
