អន្តរជាតិ៖ បើតាមការចុះផ្សាយរបស់ទូរទស្សន៍ជប៉ុនNHK នៅថ្ងៃទី ២២ ខែធ្នូ ឆ្នាំ២០២០ថា រាជអាជ្ញាជប៉ុន បានសាកសួរអតីតនាយករដ្ឋមន្ត្រីជប៉ុនលោក អាបេ ស៊ិនហ្សូ ជុំវិញការចោទប្រកាន់ថា ការិយាល័យនយោបាយលោក បានចាយលុយរដ្ឋ ដើម្បីរៀបចំកម្មវិធីជួបជុំសម្រាប់អ្នកគាំទ្រ។
ទូរទស្សន៍ NHK បន្តថា កាលពីថ្ងៃទី២១ ខែធ្នូថ្មីៗនេះ ក្រុមរាជអាជ្ញាជប៉ុន ដែលសាកសួរលោក អាបេ ស៊ិនហ្សូ បានកសាងសំណុំរឿងរួចរាល់ហើយ ដើម្បីប្ដឹងប្រឆាំងលេខារបស់លោក អាបេ ដែលអត់កត់ត្រាចំណូលនិងចំណាយនានាពាក់ព័ន្ធនឹងកម្មវិធីជួបជុំអ្នកគាំទ្រ។ ដោយក្រុមរាជអាជ្ញាជប៉ុន អះអាងថា ចំណូលនិងចំណាយសរុបនេះ ដែលពុំបានប្រកាសក្នុងរបាយការណ៍មូលនិធិនយោបាយ ប្រហែលមានចំនួនលើស៣៨,៧ម៉ឺនដុល្លារ។
បន្ថែមពីនេះទូរទស្សន៍ NHK ថា៖ លោក អាបេ ទំនងជាបដិសេធការជាប់ពាក់ព័ន្ធក្នុងសំណុំរឿងនេះ។ យ៉ាងណាមិញ រឿងអាស្រូវនេះ អាចធ្វើឲ្យកេរ្តិ៍នយោបាយរបស់លោក ខូចខាត ហើយក៏ជះឥទ្ធិពលមិនល្អដល់អ្នកស្នងតំណែងបន្តពីលោក គឺនាយករដ្ឋមន្ត្រីជប៉ុនថ្មីលោក ស៊ូហ្កាយូស៊ីហ៊ីដេ ផងដែរ។ ព្រោះលោក ស៊ូហ្កា ធ្លាប់ជាប្រធានលេខាធិការគណៈរដ្ឋមន្ត្រីរបស់លោក អាបេ ហើយក៏ធ្លាប់ទាំងចេញមុខការពារលោក អាបេ ក្នុងរឿងអាស្រូវនេះអំឡុងសន្និសីទព័ត៌មាន និងក្នុងសភាផងដែរ។
ចំណែកលេខារបស់លោកអាបេ ជាប្រធានរៀបចំកម្មវិធីជួបជុំអ្នកគាំទ្ររបស់លោកអតីតនាយករដ្ឋមន្ត្រីចន្លោះឆ្នាំ២០១៣ និង២០១៩។ ចំពោះការចំណាយលើព្រឹត្តិការណ៍ដែលបានរៀបចំឡើងនៅសណ្ឋាគារប្រណីត២ក្នុងទីក្រុង តូក្យូ ត្រូវបានប៉ាន់ស្មានថាអស់សរុបជាង២២ម៉ឺនដុល្លារ។ ដោយលុយចំណាយនេះ គឺច្រើនជាងលុយដែលប្រមូលបានពីអ្នកចូលរួម។
ដោយឡែកឆ្លើយតបនឹងការទាមទារពីបក្សប្រឆាំង បក្សកាន់អំណាចជប៉ុន ប្រជាធិបតេយ្យសេរី (LDP) ដែលលោក អាបេ បានដឹកនាំមកដល់ខែកញ្ញា មានផែនការកោះហៅលោក អាបេ ចូលមកបំភ្លឺនៅមុខសភាពាក់ព័ន្ធការចោទប្រកាន់នេះ។ ជាក់ស្តែងកាលពីថ្ងៃសុក្រសប្ដាហ៍មុន អតីតនាយករដ្ឋមន្ត្រី អាបេ ក៏បានបញ្ជាក់ថា លោកនឹងឆ្លើយសំណួរដោយស្មោះត្រង់ ក្រោយរាជអាជ្ញាបញ្ចប់ការស៊ើបអង្កេតរបស់ពួកគេ។
សូមជម្រាបថា ទាក់ទិននឹងកង្វល់ពាក់ព័ន្ធឥទ្ធិពលអវិជ្ជមាននៃរឿងអាស្រូវមួយនេះ រដ្ឋបាលលោក ស៊ូហ្កា កំពុងកើនឡើងក្នុងផ្ទៃក្នុងបក្សកាន់អំណាចជប៉ុន។ តួយ៉ាង អគ្គលេខាធិការបក្ស LDP លោក Toshihiro Nikai ទទួលស្គាល់ថា រឿងអាស្រូវនេះ នឹងប៉ះពាល់ដល់រដ្ឋបាលជប៉ុនបច្ចុប្បន្ន។ ក្នុងសន្និសីទព័ត៌មានមួយ លោកនិយាយដូច្នេះថា៖«ខ្ញុំនឹងមិននិយាយថា វានឹងមិនមានឥទ្ធិពលអវិជ្ជមានឡើយ»។
ជាមួយគ្នានេះ លោក ស៊ូហ្កា ត្រូវបានមើលឃើញប្រជាប្រិយភាពរបស់លោកបានថមថយ ដោយសារវិធានការរបស់រដ្ឋាភិបាលប្រឆាំងជំងឺកូវីដ-១៩ ដែរ។ ខណៈលោកនាយករដ្ឋមន្ត្រីជប៉ុនរូបនេះ កាលពីថ្មីៗនេះ បានរងការរិះគន់ចាស់ដៃក្រោយបានចូលរួមកម្មវិធីជួបជុំដំណាច់ឆ្នាំមួយទោះបីជាបានប្រាប់ឲ្យពលរដ្ឋជប៉ុនកុំឲ្យជួបជុំ ក្នុងពេលដែលករណីឆ្លងកូវីដ-១៩ក្នុងប្រទេសហក់ឡើងខ្ពស់ក្ដី។
គួរបញ្ជាក់ថា អតីតនាយករដ្ឋមន្ត្រីជប៉ុនលោក អាបេ ស៊ិនហ្សូ ដែលក្លាយជានាយករដ្ឋមន្ត្រីកាន់អំណាចយូរជាងគេរបស់ជប៉ុន ហើយលោកបានលាលែងតំណែងក្នុងខែកញ្ញា ឆ្នាំ២០២០ ដោយមូលហេតុសុខភាព បានបន្តច្រានចោលការប្រព្រឹត្តខុសរបស់លោកផងដែរ ចាប់តាំងពីរឿងអាស្រូវនេះ បានបែកធ្លាយកាលពីខែវិច្ឆិកា ឆ្នាំមុន៕ដោយ៖ស តារា
