អន្តរជាតិ៖ បើតាមទីភ្នាក់ងារសារពត៌មាន CNA នៅថ្ងៃពុធ ទី០៦ ខែមករា ឆ្នាំ២០២១នេះ បានចុះផ្សាយថា ប៉ូលីសហុងកុង បានចាប់ខ្លួនសកម្មជនប្រជាធិបតេយ្យហុងកុងច្រើនជាង៥០នាក់ ពីបទរំលោភបំពានច្បាប់សន្តិសុខជាតិថ្មី។
ចំពោះការចាប់ខ្លួនសកម្មជនខាងលើនេះ រួមមាន៖ សកម្មជនប្រជាធិបតេយ្យ លេចធ្លោ និងអតីតសមាជិកសភា គឺលោក James To, លោកLam Cheuk Ting, និងលោក Lester Shum ផងដែរ។ នេះបេីយោងតាមគេហទំព័រហ្វេសប៊ុករបស់គណបក្សប្រជាធិបតេយ្យ និងប្រព័ន្ធផ្សព្វផ្សាយសាធារណៈហុងកុង RTHK ។
គួរបញ្ជាក់ថា ប៉ូលីសហុងកុង បានចាប់ខ្លួនសកម្មជនទាំងនោះ ជុំវិញការចូលរួមក្នុងការបោះឆ្នោត ដែលរៀបចំឡើងដោយឯករាជ្យកាលពីខែកក្កដា ឆ្នាំ២០២០ ដើម្បីជ្រើសរើសបេក្ខជន សម្រាប់ការ បោះឆ្នោតជ្រើសរើសក្រុមប្រឹក្សានីតិបញ្ញត្ដិ ដែលរដ្ឋាភិបាលទីក្រុងហុងកុង និងទីក្រុងប៉េកាំងបានព្រមាននៅពេលនោះថាវានឹងអាចរំលោភលើច្បាប់ សន្តិសុខជាតិថ្មី។
សូមជម្រាបថា ច្បាប់សន្តិសុខជាតិថ្មី ត្រូវបានដាក់លើទីក្រុងហុងកុង ដោយទីក្រុងប៉េកាំង កាលពីខែមិថុនា ឆ្នាំ២០២០កន្លងទៅនេះ ដើម្បីទប់ស្កាត់សកម្មភាពផ្ដាច់ទឹកដី, បង្កចលាចល, ភេរវកម្ម និងការគប់គិតជាមួយបរទេស ដើម្បីបំផ្លាញសន្តិសុខជាតិ ហើយអ្នកដែលល្មើសនឹងច្បាប់នេះធ្ងន់ធ្ងរអាចនឹងជាប់ពន្ធនាគារអស់មួយជីវិត៕ដោយ៖ស តារា
