ខេត្តមណ្ឌលគិរី៖ នគរបាលខេត្តមណ្ឌលគិរី ក្រោយពេលទទូលបានពាក្យ បណ្តឹងពីគ្រួសារតាមរយៈស្នងការដ្ឋាននគរបាលរាជធានីភ្នំពេញ អំពីករណីពង្រត់គ្នា បានឃាត់ខ្លួនយុវតីម្នាក់ ក្នុងក្រុងសែនមនោរម្យ បញ្ជូនអោយទៅក្រុមគ្រួសារវិញ កាលពីថ្ងៃ២០ ខែកុម្ភៈ ឆ្នាំ២ឥ១៦។
ស្នងការនគរបាលខេត្តមណ្ឌលគិរី លោក តូច យ៉ុន បានអោយអ្នកសារព័ត៌មានដឹងនៅព្រឹកថ្ងៃ២១ខែកុម្ភៈថា នគរបាលបានធ្វើការ ឃាត់ខ្លួនយុវតីម្នាក់មានឈ្មោះខូវ នីតា ភេទស្រី អាយុ១៦ឆ្នាំ មានទីលំនៅសង្កាត់វាលវង់ ខណ្ឌ៧មករា ក្រុងភ្នំពេញ។ ដោយយោងពាក្យបណ្តឹងករណីពង្រត់ តាមរយៈការិយាល័យប្រឆាំងការជួញដូរមនុស្សរាជធានីភ្នំពេញ សមត្ថកិច្ចខេត្តមណ្ឌលគិរី បានកំណត់បានភិនភាគយុវតីខាងលើ និងបានឃាត់ខ្លួនយកមកសួរនាំនៅស្នងការដ្ឋានខេត្ត។
លោកបន្តថា ក្រោយការសាកសួរ យុវតីខាងលើ បានអោយដឹងថា ខ្លួនបានពង្រត់គ្នាជាមួយសង្សារឈ្មោះឃី សុខុម អាយុ១៨ឆ្នាំ ហើយសង្សារនោះ បានអោយនាងធ្វើដំណើរមកខេត្តមណ្ឌលគិរីមុន ហើយរូបគេនិងមកតាមក្រោយ។
សូមបញ្ជាក់ថា យុវតីរូបនេះបានចាកចេញពីផ្ទះតាំងពីថ្ងៃទី១០ ខែកុម្ភៈ ឆ្នាំ២០១៦មកម្លេះ។ បច្ចុប្បន្ន សមត្ថកិច្ចបានប្រគល់ យុវតីខាងលើជួនក្រុមគ្រួសារវិញហើយ ចំណែកឈ្មោះឃី សុខុម ប្រហែលជាដឹងខ្លួនមុនរួចគេចខ្លួនបាត់តែម្តង៕
ដោយ៖ ហេង ថារិទ្ធ (ឦសាន)
