ប៉ូលីសម៉ាឡេស៊ី រឹបអូសគ្រឿងញៀនដែលមានតម្លៃជិត៥០លានដុល្លារ ក្នុងប្រតិបត្តិការបង្ក្រាបគ្រឿងញៀនធំជាងគេនៅរដ្ឋ Johor

ចែករំលែក៖

អន្តរជាតិ៖ បើតាមការបញ្ជាក់របស់លោក Ayob Khan Mydin Pitchay ស្នងការប៉ូលីសរដ្ឋ Johor ប្រទេសម៉ាឡេស៊ី នៅថ្ងៃអាទិត្យទី១៧មករា ឆ្នាំ២០២១ បានអះអាងថា នេះជាការបង្ក្រាបគ្រឿងញៀនធំជាងគេក្នុងប្រវត្តិសាស្ត្រម៉ាឡេស៊ី បន្ទាប់ពីប៉ូលីសរឹបអូសបានគ្រឿងញៀនដែលមានតម្លៃជិត៥០លានដុល្លារ ក្នុងប្រតិបត្តិការនៅរដ្ឋ Johor កាលពីសប្ដាហ៍មុន។

លោកស្នងការប៉ូលីសរដ្ឋ Johor បានបញ្ជាក់ទៀតថា ក្នុងប្រតិបត្តិការបង្ក្រាបកន្លែងផលិត និងចែកចាយគ្រឿងញៀន ចំនួន៣កន្លែង ហើយរឹបអូសគ្រឿងញៀនដែលមានតម្លៃដល់ទៅ៤៩,៨លានដុល្លារ។ ហេីយនេះជាស្នាដៃការបង្ក្រាប ទ្រង់ទ្រាយធំបង្អស់ក្នុងប្រវត្តិសាស្ត្ររបស់នាយកដ្ឋានប្រឆាំងគ្រឿងញៀនរបស់ម៉ាឡេស៊ី។

ជាក់ស្តែងក្នុងប្រតិបត្តិការនេះ ប៉ូលីស បានលបវាយឆ្មក់ចំនួន ៣កន្លែងផ្សេងគ្នាគឺ នៅឯរោងចក្រផលិតគ្រឿងញៀន នៅ Taman Mount Austin និងផ្ទះជួលស្តុកគ្រឿងញៀន២កន្លែងផ្សេងទៀតកាលពីថ្ងៃព្រហស្បតិ៍និងថ្ងៃសុក្រសប្ដាហ៍មុន។ ចំពោះការវាយឆ្មក់នេះធ្វើឡើងបន្ទាប់ពីបានសាកសួរជនសង្ស័យចំនួន១៤នាក់នៃក្រុមរត់ពន្ធនិងចែកចាយគ្រឿងញៀនមួយ ដែលត្រូវបានចាប់ខ្លួនតាំងពីដើមសប្ដាហ៍មុននៅទីក្រុង Johor Barhu។ នេះបេីតាមទីភ្នាក់ងារពត៌មានរដ្ឋ Bernama បានចុះផ្សាយ។

ដោយឡែកក្នុងប្រតិបត្តិការដំបូង នាយកដ្ឋានស៊ើបអង្កេតបទល្មើសគ្រឿងញៀន បានរកឃើញកន្លែងផលិតគ្រឿងញៀន២កន្លែង និងកន្លែងចែកចាយ២ផ្សេងទៀតដែលមានគ្រឿងញៀនមានតម្លៃច្រើនលានដុល្លារដែរ។ ជាសរុប គ្រឿងញៀនដែលរឹបអូសបានប្រភេទម្សៅEcstasy ទម្ងន់ ៣,២តោន, ប្រភេទ Ecstasy រាវ ២៦,១គីឡូក្រាម, និងម្សៅ Erimin-5 ទម្ងន់១១៧គីឡូក្រាម។ ប៉ូលិសម៉ាឡេស៊ីប៉ាន់ស្មានថាគ្រឿងញៀនទាំងនេះ អាចចែកចាយដល់អ្នកប្រើប្រាស់ប្រហែល១១លាននាក់។

ក្រៅពីនេះ ក្នុងប្រតិបត្តិការចុះបង្ក្រាបនេះ ប៉ូលីស ក៏បានរឹបអូសវត្ថុតាងដូចជា៖ រថយន្តទំនើបចំនួន ៤គ្រឿង, លុយសុទ្ធ៥លានរីងហ្គីត (លុយម៉ាឡេស៊ី), លុយបរទេសជាង ២៣ម៉ឺនរីងហ្គីត, គ្រឿងអលង្ការ ៣០ប្រភេទ, នាឡិកា Rolex បីគ្រឿង, និងគណនីធនាគារចំនួន៦២ ផ្ទុកលុយសរុបប្រមាណ ១,២៣លានរីងហ្គីតទៀត។