យោធាមីយ៉ាន់ម៉ាដែលឡើងកាន់អំណាចក្រោយការធ្វើរដ្ឋប្រហារ នោះ នៅពេលនេះបានតែងតាំងមន្ត្រី១១រូបដើម្បីជំនួសតំណែងបណ្តារដ្ឋមន្ត្រី និងរដ្ឋលេខាធិការ២៤រូបដែលបានដកចេញ។
មន្ត្រី១១រូបដែលយោធាជ្រើសរើស ឲ្យកាន់តំណែងក្រសួងហិរញ្ញវត្ថុ សុខាភិបាល ក្រសួងការបរទេស ក្រសួងការពារជាតិ ក្រសួងមហាផ្ទៃ … ក្រោយមន្ត្រីទាំងនោះត្រូវដកចេញ ហើយខ្លះទៀតត្រូវចាប់ខ្លួន។
កាលពីយប់ថ្ងៃទី១ខែកុម្ភៈ បណ្តាញទូរទស្សន៍យោធា Myawaddy TV បានផ្សាយថា បានដកមន្ត្រី២៤រូប ដោយជំនួសមកវិញមន្ត្រីយោធា១១រូប។
ការតែងតាំងមន្ត្រីថ្មីកើតឡើងក្រោយពេលដែលកម្លាំងទាហានមីយ៉ាន់ម៉ាចាប់ខ្លួនប្រធានាធិបតី និងមេបក្សកាន់អំណាចរួមទាំងមន្ត្រីយោធាជាច្រើនរូបទៀត ។ ជាមួយគ្នានោះយោធាក៏បានដាក់ប្រទេសក្នុងច្បាប់អាជ្ញាសឹករយៈពេល១ឆ្នាំ។
បណ្តាញទូរទស្សន៍យោធាមីយ៉ាន់ម៉ា បានផ្សាយថា ការចាប់ខ្លួនថ្នាក់ដឹកនាំ គឺពាក់ព័ន្ធនឹងការបន្លំសន្លឹកឆ្នោតក្នុងការបោះឆ្នោតកាលពីខែវិច្ឆិកា ឆ្នាំ២០២០ ។ ការដែលប្រកាសដាក់ប្រទេសក្រោមច្បាប់អាជ្ញាសឹកគឺជារឿងចាំបាច់បំផុតដើម្បីរក្សាសន្តិសុខស្ថិរភាព។ ទន្ទឹមនឹងនោះ យោធាប្រកាសថានឹងរៀបចំការបោះឆ្នោត ក្រោយច្បាប់អាជ្ញាសឹកបានបញ្ចប់រយៈពេល១ឆ្នាំ៕ ដោយ៖ធី រីណា
រូបថត៖Sky News
