ភ្នំពេញ៖ លោក ហេង រត្នពិសិដ្ឋ អគ្គនាយកសាធារណការ និងលោក ហ៊ាង វុត្ថា អគ្គនាយកបច្ចេកទេសនៃក្រសួងសាធារណការនិងដឹកជញ្ជូន និងលោក រស់ បរម អគ្គនាយករងថវិកានៃក្រសួងសេដ្ឋកិច្ចនិងហិរញ្ញវត្ថុ នៅថ្ងៃទី២៤ ដល់ទី២៦ ខែកុម្ភៈ ឆ្នាំ២០២១ បានដឹកនាំក្រុមការងារបច្ចេកទេសអន្តរក្រសួងចុះពិនិត្យការអនុវត្តនិងវឌ្ឍនភាពការងារសាងសង់ហេដ្ឋារចនាសម្ព័ន្ធផ្លូវថ្នល់ ស្ពាន ក្នុងក្របខណ្ឌថវិកាជាតិ ជំពូក៦១ និង២១ ឆ្នាំ២០២០ និង ២០២១ ក្នុងខេត្តសៀមរាប បន្ទាយមានជ័យ បាត់ដំបង និងកំពង់ធំ។
ក្នុងឱកាសនោះផងដែរ ក្រុមការងារ បានណែនាំដល់អង្គភាពអនុវត្តគម្រោង ត្រូវអនុវត្តតាមអនុសាសន៍របស់លោកទេសរដ្ឋមន្រ្តី ស៊ុន ចាន់ថុល រដ្ឋមន្ត្រីក្រសួងសាធារណការ ក្នុងការសាងសង់ប្រកបដោយគុណភាព ចៀសវាងការធ្វើវិញដដែលៗ ម្ដងជាពីរដង ជាបីដង។
បន្ថែមទៀត លោកថ្នាក់ដឹកនាំ នៃអគ្គនាយកដ្ឋានទាំងពីរ បានឲ្យអង្គភាពអនុវត្តយកចិត្តទុកដាក់លើបញ្ហាសុវត្ថិភាពនៅការដ្ឋាន ចៀសវាងគ្រោះថ្នាក់ដល់ប្រជាពលរដ្ឋ និងត្រូវរៀបចំផែនការអនុវត្តគម្រោងឲ្យមានប្រសិទ្ធភាព ចៀសវាងការសាងសង់មានរយៈពេលយូរ ដែលនាំឲ្យប៉ះពាល់ដល់ការធ្វើដំណើររបស់ប្រជាពលរដ្ឋ ក៏ដូចជាប៉ះពាល់ដល់សេដ្ឋកិច្ចជាតិ៕ដោយ៖សហការី
