សូមចូលរួមសោកស្ដាយ! អ្នកច្នៃប្រឌិតបង្កើត «កាសែតម៉ាញេ» បានទទួលមរណភាពក្នុងអាយុ៩៤ឆ្នាំ

ចែករំលែក៖

អន្តរជាតិ៖ បើតាមការចេញផ្សាយរបស់ទូរទស្សន៍ CNN បាននិយាយថា អ្នកច្នៃប្រឌិតបង្កើត «កាសែតម៉ាញេ» (Cassette Tape) លោក Lou Ottens បានទទួលមរណភាពក្នុងអាយុ៩៤ឆ្នាំកាលពីថ្ងៃទី៦ ខែមីនា នៅផ្ទះរបស់ខ្លួនក្នុងក្រុង Duizel ប្រទេសហូឡង់។ ប៉ុន្តែតាមប្រភពពីក្រុមគ្រួសារលោក Ottens មិនបានបញ្ជាក់ពីមូលហេតុពិតប្រាកដនៃការស្លាប់របស់លោកឡើយ។

សូមជម្រាបថា លោក Lou Ottens ជាវិស្វករជំនាញម្នាក់របស់ហូឡង់ ដែលធ្វើជាប្រធានផ្នែកអភិវឌ្ឍផលិតកម្មនៅក្រុមហ៊ុន Philips Hasselt ពីឆ្នាំ១៩៦០ ដល់ឆ្នាំ១៩៦៩។ នៅឆ្នាំ១៩៦៣ លោកបានដឹកនាំក្រុមការងារផលិតឧបករណ៍ដែលអាចចម្លងសំឡេង ពោលគឺកាសែត។ ឈានដល់ឆ្នាំ១៩៨៨ ពោលគឺ២៥ឆ្នាំក្រោយ កាសែតម៉ាញេ (Cassette Tape) បានបង្ហាញវត្តមាននៅលើទីផ្សារពិភពលោក។

លោក Ottens មុនក្លាយជាថ្នាក់ដឹកនាំ បានចាប់ផ្តើមធ្វើការនៅក្រុមហ៊ុន Philips តាំងពីឆ្នាំ១៩៥២មក ហើយ កាសែតម៉ាញេ ដែលផ្តួចផ្តើមបង្កើតដោយលោកផ្ទាល់ ត្រូវបានប៉ាន់ស្មានថា លក់ដាច់នៅលើទីផ្សារជាង១០០ពាន់លានកាសែត។ ក្រោយមក លោក Ottens ក៏បានត្រួសត្រាយក្រុមការងារលើដំណើរការផលិតកាសែត CD (Compact Disc) ផងដែរ។

ដោយឡែកនាយកសារមន្ទី Philips Museum នៅក្រុង Eindhoven លោក Olga Coolen បានពិព័ណ៌នាលើរូបលោក Ottens ថា ជាបុរសដ៏អស្ចារ្យម្នាក់ដែលស្រឡាញ់បច្ចេកវិទ្យា។

គួរបញ្ជាក់ថា នៅឆ្នាំ១៩៨៦លោក Ottens បានចូលនិវត្តន៍ពីការងារ ហើយកាលពីឆ្នាំ២០១៣ នាខួប៥០ឆ្នាំនៃការបង្កើតកាសែតម៉ាញេ សារមន្ទីរ Philips Museum បានរៀបចំព្រឹត្តិការណ៍តាំងពិព័រណ៌ដ៏ធំមួយដើម្បីរំលឹកគុណលោក Ottensផងដែរ៕ដោយ៖ស តារា