ភ្នំពេញ៖ យុវជនម្នាក់ដោយសារតណ្ហាឡេីងដល់កម្រិតកំពូលទ្រាំលែងបាន
ឃេីញប្អូនស្រីគូដណ្តឹងរបស់ខ្លួនទំនងពេកក៏បានធ្វេីសកម្មភាពចាប់រំលោភ តែមិនបានសម្រេចត្រូវបានម្ចាស់ផ្ទះជួលនិងអ្នកជិតខាងនាំគ្នាចាប់ខ្លួនប្រគល់ជូននគរបាលប៉ុស្តិ៍ចោមចៅទី១យកទៅសាកសួរនិងចាត់ការតាមច្បាប់ ។

ហេតុការណ៍នេះបានកើតឡើងកាលពីវេលាម៉ោង៨និង៣០នាទីព្រឹកថ្ងៃទី១៤ ខែមីនា ឆ្នាំ២០២១ នៅក្នុងបន្ទប់ជួលលេខ0៤A ផ្លូវបេតុង ភូមិត្រពាំងថ្លឹង៤ សង្កាត់ចោមចៅទី១ ខណ្ឌពោធិ៍សែនជ័យ។

​ ជនសង្ស័យឈ្មោះបុិច លីឃឹម អាយុ២០ឆ្នាំ មុខរបរកម្មកររោងចក្រ ស្នាក់នៅក្នុងបន្ទប់កើតហេតុ ចំណែកនារីរងគ្រោះអាយុ២១ឆ្នាំស្នាក់នៅបន្ទប់ជួលជាមួយគ្នានោះដែរ។

តាមប្រភពព័ត៌មានបានឱ្យដឹងថា ជនសង្ស័យនិងបងស្រីរបស់នារីរងគ្រោះគឺត្រូវជាគូដណ្ដឹងនិឹងគ្នា ហើយបានស្នាក់នៅក្នុងបន្ទប់ជួលជាមួយគ្នាមួយរយៈពេលកន្លងមកហើយ លុះដល់វេលាព្រឹកថ្ងៃកើតហេតុស្រ្តីជាគូដណ្ដឹង បានចេញទៅធ្វើការដោយទុកឲ្យជនសង្ស័យនិងប្អូនស្រី(ជនរងគ្រោះ)នៅក្នុងបន្ទប់តែ២នាក់។ខណៈនោះនារីរងគ្រោះបានដេកមើលទូរស័ព្ទនៅក្នុងបន្ទប់ ហើយជនសង្ស័យក៏បានបិទទ្វារខ្ទាស់គន្លឹះជាប់រួចចាប់ឱបថើបនាងបម្រុងរំលោភ។

ប្រភពដដែលបានបន្តទៀតថា ប៉ុន្តែខណៈនោះត្រូវនាងរើបម្រះមិនព្រមនិងខាំអណ្ដាតជននោះបណ្ដាលឲ្យរងរបួសហូរឈាម រួចស្រែកយំខ្លាំងៗបង្កឲ្យមានការភ្ញាក់ផ្អើលដល់អ្នកជិតខាងនិងម្ចាស់ផ្ទះជួលនាំគ្នាទៅមើលនិងគោះទ្វារហៅទើបជនសង្ស័យលែងនារីរងគ្រោះ។បន្ទាប់មកនាងបានបើកទ្វារចេញមកក្រៅប្រាប់អ្នកជិតខាងថាជនសង្ស័យចាប់រំលោភនាង ទើបអ្នកជិតខាងនិងម្ចាស់ផ្ទះជួលឃាត់ខ្លួនជននេះប្រគល់ជូននគរបាលដើម្បីធ្វើការសាកសួរនិងចាត់ការតាមច្បាប់៕

   

ដោយ៖សុខាសែនជ័យ​