ខេត្តរតនគិរី ៖ ជនសង្ស័យពីរនាក់ត្រូវកម្លាំងកងរាជអាវុធហត្ថក្រុងបានលុងឃាត់ខ្លួន គ្រាធ្វើការចុះបង្ក្រាបនិងឆែកឆេរករណីលាក់ទុកនិងចែកចាយនូវសារធាតុញៀន។
ប្រតិបត្តិការនេះធ្វើឡើងនៅវេលាម៉ោង១៦និង៤៥នាទីថ្ងៃទី១៦ ខែកក្កដា ឆ្នាំ២០១៥ ក្នុងលំនៅដ្ឋានមួយកន្លែង ស្ថិតក្នុងភូមិជ័យជំនៈ សង្កាត់ឡាបានសៀក ក្រុងបានលុង សកម្មភាពបង្ក្រាបនេះដឹកនាំដោយលោកម៉ម វណ្ណដា ព្រះរាជអាជ្ញារង អមសាលាដំបូងខេត្តរតនគិរី។
លោកហៃ វណ្ណារ៉ា មេបញ្ជាការកងរាជអាវុធហត្ថក្រុងបានលុងបានអោយដឹងថា មុននឹងឈានដល់ការឆែកឆេរនិងឃាត់ខ្លួនជនសង្ស័យទាំងពីរនោះ លោកបានប្រើកម្លាំងបង្កប់អស់រយៈពេលជាច្រើនខែកន្លងមកហើយ ទើបបានទទួលពត៌មានចូលដោយវិធានការញុះញុង រយៈពេល៣ថ្ងៃបន្តទៀត ទើបធ្វើការចុះអនុវត្តតែម្តង។ លោកបន្តថាជនសង្ស័យទាំងពីរនោះមានឈ្មោះ ងៀង ធីបេហាយ ភេទស្រី អាយុ៥៧ឆ្នាំ ជនជាតិវៀតណាម មុខរបរមិនពិតប្រាកដ និងម្នាក់ទៀតឈ្មោះ យូ សៀងណាលី ភេទស្រី អាយុ១៧ឆ្នាំជនជាតិខ្មែរ មុខរបរមិនពិតប្រាកដ អ្នកទាំងពីរមានទីលំនៅនៅភូមិជ័យជំនៈ សង្កាត់ឡាបានសៀក ក្រុងបានលុង។ វត្ថុតាំងដែលត្រូវដកហូតរួមមាន ទូរស័ព្ទដៃចំនួន៥គ្រឿង លិខិតឆ្លងដែន១ក្បាល (Passport) ថ្នាំញៀនប្រភេទមេតំទ្វេតាមីន(ម៉ាទឹកកក)ចំនួន៣កញ្ចប់តូច សម្ភារៈសេព និងសម្ភារៈវិចខ្ចប់មួយចំនួនព្រមទាំងថវិការមួយចំនួនទៀត។ លោកបន្តទៀតថាដោយទីតាំបង្ក្រាបនោះមានសភាពស្មុកស្មាញពេកជនសង្ស័យវ័យចំណាស់ក៏បានយកថ្នាំញៀនចាក់ចោលក្នុងបង្គន់ផ្ទះរបស់ខ្លួនអស់មួយចំនួនធំទៅហើយ។ ជនសង្ស័យទាំងពីរនាក់នេះត្រូវបានកម្លាំងសមត្ថកិច្ចឃាត់ខ្លួនបណ្តោះអាសន្ននៅមូលដ្ឋានកងរាជអាវុធក្រុងបានលុងបំពេញសំណុំរឿងបញ្ជូនទៅតុលាការនៅព្រឹកថ្ងៃស្អែកថ្ងៃទី១៧ ខែកក្កដា ឆ្នាំ២០១៥ ដើម្បីផ្តន្ទាទោសទៅតាមនិតិវិធីច្បាប់៕
