សូមបញ្ជាក់ថា, ប្រជាពលរដ្ឋក្នុងមូលដ្ឋាន បានឲ្យដឹងថា,  ដីព្រៃកោងកាង ដែលឈ្មួញបានគប់គិតជាមួយមន្រ្តីមូលដ្ឋានបានកាប់បំផ្លាញ ឈូសឆាយ ព្រៃកោងកាង ចាក់ដីលុបព្រៃកោងកាងកាងតូចធំ មិនមែនប្រជាពលរដ្ឋ ឬរាស្រ្តធម្មតានោះទេ គឺសុទ្ធតែអ្នកមានលុយមានអំណាចទើបអាចប្រព្រឹត្តទៅរួច បើរាស្រ្តកាប់តែដើមធ្វើអុស ឬដុតធ្យូងដើម្បីដុតក្នុងគ្រួសារវិញដឹងតែគេចាប់ដាក់គុក ដោយចោទថា កាប់បំផ្លាញព្រៃធម្មជាតិ តែបើឈ្មួញអ្នកមានលុយ និងអ្នកមានអំណាច កាប់បំផ្លាញឈូសឆាយដី ជាសម្បត្តិរបស់រដ្ឋធ្វើជាសកម្មសិទ្ធិ គឺគ្មានសមត្ថកិច្ចណាហ៊ានចាប់ដាក់គុកទេ មានតែបិតភ្នែកបន្ថែមធ្វើមើលមិនឃើញ។ នេះបើយោងតាមសារព័ត៌មានក្នុងស្រុកមួយបានដកស្រង់សំដីចេញកន្លងទៅ។

សារព័ត៌មានដដែលបានលើកឡើងថា, ទាក់ទិននឹងករណីនេះដែរលោក សុខ សុទ្ធី អភិបាលរងខេត្តកោះកុង និងជាអ្នកនាំពាក្យរដ្ឋបាលសាលាខេត្តនៅ ថ្ងៃទី១៨ ខែមីនា ឆ្នាំ២០២១នេះ បានអះអាងថា ឈ្មួញដែលបានចាក់ដីលុបព្រៃកោងកាងនេះមានម្ចាស់ឈ្មោះ លាង ហ៊ីម ហៅម៉ាហ្គោល។ ឈ្មួញរូបនេះបានអះអាងថា ខ្លួនបានទិញពីប្រជាជនពលរដ្ឋ និងមេឃុំដីសហគមន៍ ដែលមានទំហំប្រហែល ១២ហិកតា ជាថ្នូរនឹងកាត់ធ្វើផ្លូវលូរំដោះទឹកប្រៃ កុំឲ្យចូលក្នុងស្រែនិងតារាងបាល់ ហើយ១ផ្នែកទៀត មានព្រៃកោងកាងមានទំហំ ៣,៣០២ ម៉ែត្រការ៉េ។

លោក សុខ សុទ្ធី បានអះអាងទៀតថា ពាក់ព័ន្ធនឹងការចាក់ដីរំលោភព្រៃកោងកាងធ្វើជាកម្មសិទ្ធិនេះ អាជ្ញាធរនឹងដកហូតទីតាំងនោះទុកជាសម្បត្តិរដ្ឋវិញ ដោយមិនអនុញ្ញាតឲ្យឈ្មួញយកធ្វើជាកម្មសិទ្ធិផ្ទាល់ខ្លួនបានឡើយ។ ចំពោះដីទំតាំងក្នុងសហគមន៍ដែលបានលក់កន្លងមក ត្រូវចុះសិក្សាឲ្យបានលម្អិតសិន តើដីជាដីរបស់ប្រជាពលរដ្ឋពិតប្រាកដមែន ឬអាជ្ញាធរឃុំជាអ្នកបែងចែក ហើយការចាត់ចែងសមស្របតាមអី្វដែលជារបស់សហគមន៍ឬទេ។

លោកបានបញ្ជាក់ទៀតថា ចំពោះម្ចាស់កម្មសិទ្ធិ ដែលចាក់អាចម៍ដីរំលោកចូលព្រៃកោងកាងនោះ អាជ្ញាធរនឹងបញ្ជាឲ្យគាត់កាយអាចម៍ដីចេញវិញឲ្យអស់ ហើយដាំកូនកោងកាងបំពេញវិញ។ តែចំពោះផ្លូវច្បាប់វិញទុកលទ្ធភាព ព្រះរាជអាជ្ញា ក្នុងការចាត់វិធានការតាមផ្លូវច្បាប់ចំពោះអ្នកប្រព្រឹត្ត។
ប្រជាពលរដ្ឋបានគាំទ្រចំពោះចំណាត់ការ របស់អាជ្ញាធរខេត្តកោះកុង ក្នុងការទប់ស្កាត់ និងមានវិធានការតាមផ្លូវច្បាប់ ក្នុងនាមការពារអោយផលប្រយោជន៍ជាតិ ។
ប្រជាពលរដ្ឋសង្ឃឹមថា, តំណាងអយ្យការនឹងបន្តនីតិវិធីក្នុងរឿងនេះ ដើម្បីស្រាវរកអោយឃើញអ្នកពាក់ព័ន្ធ ទាំងនោះជាមួយឈ្មួញ៕

ដោយ, សិលា