អង្គការ UNICEF ថា៖ ក្នុងខែឧសភាខាងមុខនេះ ខ្លួនរំពឹងទទួលបានការផ្គត់ផ្គង់វ៉ាក់សាំងពេញលេញឡើងវិញ

ចែករំលែក៖

អន្តរជាតិ៖ បន្ទាប់ពីឥណ្ឌា បានពន្យារពេលផ្គត់ផ្គង់វ៉ាក់សាំង Covishield របស់ក្រុមហ៊ុន AstraZeneca សម្រាប់ខែមីនា និងខែ មេសា កាលពីពេលថ្មីៗនេះ អង្គការ UNICEF អះអាងថា យន្តការ COVAX ដែលឧបត្ថម្ភដោយអង្គការសុខភាពពិភពលោក(WHO) រំពឹងទទួលបានវ៉ាក់សាំងពេញលេញពីវិទ្យាស្ថាន Serum របស់ឥណ្ឌាឡើងវិញ នៅក្នុងខែឧសភាខាងមុខនេះ ដើម្បីចែកចាយឲ្យប្រទេស ក្រីក្រ។

បេីតាមការបញ្ជាក់របស់អ្នកនាំពាក្យ UNICEF ក្នុងសារអេឡិចត្រូនិកឆ្លើយតបទៅសារព័ត៌មានReuters នៅថ្ងៃទី២៨ ខែមីនាម្សិលមិញនេះ បានបញ្ជាក់ថា៖«ការដឹកជញ្ជូនវ៉ាក់សាំង ត្រូវបានរំពឹងថាចាប់ផ្តើមទាំងស្រុងឡើងវិញក្នុងខែឧសភា»។ អ្នកនាំពាក្យរូបនេះ ក៏អះអាងដែរថា ខ្លួននឹងពន្លឿនការផ្គត់ផ្គង់វ៉ាក់សាំងនេះដើម្បីបំពេញសេចក្តីត្រូវការក្នុងខែមីនា និងមេសាផងដែរ។

អ្នកនាំពាក្យ UNICEF បន្តទៀតថា យន្តការ COVAX កំពុងតែចរចាជាមួយរដ្ឋាភិបាលឥណ្ឌាដើម្បីទទួលបានវ៉ាក់សាំង មួយចំនួនក្នុងខែមេសា។ ដោយឡែកសម្រាប់ខែមីនា និងមេសា យន្តការនេះសង្ឃឹមថា នឹងអាចទទួលបានវ៉ាក់សាំងចំនួន៩០ លានដូស ប៉ុន្តែមកដល់ពេលនេះទើបតែទទួលបាន២៨លានដូសប៉ុណ្ណោះ។

សូមជម្រាបថា យន្តការ COVAX ដែលបង្កើតឡើងដើម្បីចែកចាយវ៉ាក់សាំងប្រកបដោយសមធម៌ទំនងជាអាចទទួលបានវ៉ាក់សាំង ដើម្បីចែកចាយទូទាំងពិភពលោកជាថ្មីក្នុងខែឧសភា។ កាលពីថ្ងៃទី២៥ ខែមីនាកន្លងទៅ ឥណ្ឌាដែលជាប្រទេស ផលិតវ៉ាក់សាំងឱ្យយន្តការនេះ អះអាងថា ខ្លួននឹងពន្យារពេលផ្គត់ផ្គង់វ៉ាក់សាំងសម្រាប់ខែមីនា និងមេសាដើម្បីផ្តល់ អាទិភាពដល់ការចាក់វ៉ាក់សាំងក្នុងស្រុក។

ទាក់ទិននឹងបញ្ហានេះដែរ ឥណ្ឌា ធ្លាប់លើកឡើងនៅថ្ងៃទី២៦ ខែមីនាថា ខ្លួនផ្តល់អាទិភាពដល់ការចាក់វ៉ាក់សាំងកូវីដ-១៩ ក្នុង ប្រទេសខ្លួន ខណៈករណីឆ្លងកំពុងកើនឡើង។ ឥណ្ឌា ក៏បានពន្យល់អន្តរជាតិពីការសម្រេចចិត្តរបស់ខ្លួនផងដែរ។

ដោយឡែកអគ្គនាយក WHO លោក Tedros Adhanom Ghebreyesus ចំពោះការផ្អាកផ្គត់ផ្គង់វ៉ាក់សាំងនេះដែរ ក៏បានអះអាងថា ការសម្រេចចិត្តរបស់ឥណ្ឌា ជារឿងដែលអាចយោគយល់បាន និងថា ស្ថាប័ននេះនៅតែបន្តការពិភាក្សាដើម្បីអាច ផ្តល់វ៉ាក់សាំងដល់ប្រទេសកំពុងអភិវឌ្ឍឯទៀត។

ចំពោះយន្តការ COVAX នេះដែរ គិតត្រឹមចុងខែមីនានេះ បានផ្គត់ផ្គងវ៉ាក់សាំងចំនួន៣២លានដូស ដល់ប្រទេសចំនួន៦១ ខណៈប្រទេសចំនួន៣៦ផ្សេងទៀតដែលស្ថិតក្នុងយន្តការនេះពុំទាន់បានទទួលវ៉ាក់សាំងនៅឡើយទេ។

ក្នុងកិច្ចសម្ភាសន៍ជាមួយសារព័ត៌មាន CBC នាថ្ងៃទី២៨ ខែមីនា អគ្គលេខាធិការអង្គការសហប្រជាជាតិ(UN)លោក អាន់តូនីញ៉ូ ហ្គូតេរ៉េស បានលើកអំពីបញ្ហាក្នុងការបែងចែកវ៉ាក់សាំងនេះដែរថា៖លោក ព្រួយបារម្ភពីការបែងចែកវ៉ាក់សាំងដែលមានលក្ខណៈអយុត្តិធម៌នៅជុំវិញពិភពលោក។ បន្ថែមពីនេះលោក ហ្គូតេរ៉េស សង្កត់ធ្ងន់ថា UN បានអំពាវនាវទៅ ប្រទេសអ្នកមានឱ្យជួយចែករំលែកវ៉ាក់សាំងដែលខ្លួនមាន ដ្បិតអីប្រទេសខ្លះមានវ៉ាក់សាំងច្រើនជាងចំនួនត្រូវការ ទៅទៀត។

គួរបញ្ជាក់ថា ចំពោះការលើកឡើងរបស់លោក ហ្គូតែរ៉េស ធ្វើឡើងបន្ទាប់ពីសហភាពអឺរ៉ុប(EU) ដែលមានសមាជិកចំនួន២៧ បានរឹតបន្តឹងការនាំចេញវ៉ាក់សាំង។ ជាមួយគ្នានេះ ប្រមុខ UN រំឭកថា វាជាផលប្រយោជន៍របស់ប្រទេសទាំងអស់ក្នុងការធានាថា មនុស្ស នៅគ្រប់ទីកន្លែងទាំងអស់បានទទួលវ៉ាក់សាំង ហើយវ៉ាក់សាំងគឺជាសម្បត្តិសាធារណៈសាកល៕ដោយ៖ស តារា