អន្តរជាតិ៖ បើតាមទីភ្នាក់ងារសារព័ត៌មានថៃ Bangkok Post បានចុះផ្សាយថា អាជ្ញាធរគ្រប់គ្រងស្ថានការណ៍ COVID-19 នៅក្នុងប្រទេសថៃ នៅថ្ងៃពុធទី០៧ ខែមេសា ឆ្នាំ២០២១នេះ បានប្រកាសពីការរកឃើញអ្នកឆ្លងជំងឺកូវីដ-១៩ថ្មី ចំនួន ៣៣៤នាក់បន្ថែមទៀតក្នុងនោះ៖ អ្នកជំងឺ ៣២៧នាក់ជាករណីឆ្លងក្នុងស្រុក និង ០៧នាក់ទៀតជាករណីនាំចូល។
ជាក់ស្ដែងនៅក្នុងរបាយការណ៍ប្រចាំថ្ងៃរបស់អាជ្ញាធរគ្រប់គ្រងស្ថានការណ៍ COVID-19 បានបញ្ជាក់ថា ក្នុងចំណោមករណីឆ្លង COVID-19 ក្នុងស្រុកទាំង ៣២៧ករណីនោះ គឺ ២១៦នាក់ ត្រូវបានរកឃើញ នៅទីក្រុងបាងកក, ២០នាក់នៅខេត្តសាកែវ, ១៥នាក់នៅខេត្តសាមុតប្រាកាន, ១២នាក់នៅខេត្តសាមុតសាខន, ០៨នាក់នៅខេត្តនុនថាបុរី, ០៦នាក់នៅខេត្តឈុនបុរី, ០២នាក់នៅខេត្តឈៀងម៉ៃ និងខេត្តមួយចំនួនទៀតមានអ្នកឆ្លងតិចតួច។
បច្ចុប្បន្នគិតត្រឹមថ្ងៃពុធទី៧ ខែមេសានេះ ប្រទេសថៃ មានករណីឆ្លង COVID-19 សរុប ២៩,៩០៥ករណី ក្នុងនោះមានអ្នកស្លាប់ ៩៥នាក់ និងជាសះស្បើយឡើងវិញ ២៨,០៦៩នាក់ (ស្មើនឹង ៩៣%)។
គួរបញ្ជាក់ថា ករណីឆ្លងថ្មីៗដែលត្រូវបានប្រកាសនៅថ្ងៃនេះ គឺជាការកើនឡើងកម្រិតខ្ពស់ថ្មីមួយទៀត លើសកាលពីថ្ងៃទី៦ខែមេសាម្សិលមិញនេះ ដែលមានឆ្លង COVID-19 ចំនួន ២៥០ករណី ក្រោយការផ្ទុះករណីឆ្លងយ៉ាងច្រើន នៅទីកន្លែងកម្សាន្តមួយចំនួន នៅក្នុងទីក្រុងបាងកក៕ដោយ៖ស តារា
ប្រជាជនថៃ នាំគ្នាចាក់វ៉ាក់សាំងប្រឆាំងជំងឺកូវីដ-១៩
