មេដឹកនាំពិភពលោកបានសាទរចំពោះការរីកចម្រើននៅក្នុងប្រទេសស៊ីរី កាលពីថ្ងៃទី៤ ខែមីនា ឆ្នាំ២០១៦ ប៉ុន្តែការបន្តកើតឡើងការបាញ់មីស៊ីលពីលើដែនអាកាសនោះបានបង្ហាញឲ្យឃើញពីសកម្មភាពផុយស្រួយដល់កិច្ចព្រមព្រៀងឈប់បាញ់រយៈពេល១សប្តាហ៍នោះខ្លាំងណាស់ ហើយក្រុមប្រឆាំងស៊ីរីបញ្ជាក់ថា ពួកគេនៅមិនទាន់ជ្រះស្រឡះនៅក្នុងការចូលរួមចរចានៅទីក្រុងហ្សឺណែកនៅសប្តាហ៍ក្រោយនៅឡើយទេ ។
ក្រុមអ្នកសង្កេតការណ៍បានបញ្ជាក់ថា យន្តហោះចម្បាំងបានធ្វើសកម្មភាពវាយប្រហារទៅលើទីតាំងរបស់ក្រុមប្រឆាំងនៅរដ្ឋធានីភាគខាងកើត ជាលើកដំបូងបន្ទាប់ពីកិច្ចព្រមព្រៀងឈប់បាញ់យ៉ាងផុយស្រួចបានចាប់ផ្តើមតាំងពីសប្តាហ៍កន្លងមក ។
លោក Rami Abdel Rahman ប្រធានក្រុមសង្កេតការណ៍សិទ្ធិមនុស្សស៊ីរីមានមូលដ្ឋាននៅចក្រភពអង់គ្លេសបានថ្លែងថា ការវាយប្រហារតាមដែនអាកាស២លើកទៅកាន់ទីប្រជុំជន Douma ស្ថិតនៅ Eastern Ghouta បណ្តាលឲ្យបាត់បង់ជីវិតម្នាក់ ។ Eastern Ghouta នោះជាបន្ទាយដ៏ធំបំផុតរបស់ក្រុមប្រឆាំង ដែលស្ថិតនៅភាគខាងកើតទីក្រុងដាម៉ាកាស ហើយតែងតែទទួលរងការទម្លាក់គ្រាប់បែកពីកងកម្លាំងរដ្ឋាភិបាល ។ ប៉ុន្តែទោះបីយ៉ាងណា ការបាញ់ប្រហារដោយផ្លោងអាវុធដាក់គ្នាទៅវិញទៅមកនៅទីនេះមានការស្ងប់ស្ងាត់ ក្រោយកិច្ចព្រមព្រៀងឈប់បាញ់ត្រូវបានអនុវត្តធ្វើឡើងដោយអាមេរិក និងរុស្ស៊ី ។
រដ្ឋមន្ត្រីការបរទេសអង់គ្លេស, អាល្លឺម៉ង់ និងសហភាពអឺរ៉ុបបានជួបជុំគ្នានៅទីក្រុងប៉ារីស ប្រទេសបារាំង ដើម្បីពិភាក្សាទៅលើការបញ្ចប់អរិភាពនេះ ហើយបានលើកឡើងថា ដំណើរការពិតជាមានការរីកចម្រើន ។ រដ្ឋមន្ត្រីការបរទេសអង់គ្លេស លោក Philip Hammond បានថ្លែងថា ការបញ្ឈប់អរិភាពនេះ បើទោះបីមិនបានល្អឥតខ្ចោះក៏ដោយ ប៉ុន្តែវាបានកាត់បន្ថយអំពើហិង្សាឲ្យស្ថិតនៅមានកម្រិតផងដែរ ។ វាបានបង្កើតឱកាសមួយសម្រាប់ក្រុមផ្តល់ជំនួយមនុស្សធម៌ដើម្បីចូលទៅកាន់ទីតាំងពលរដ្ឋរងគ្រោះ និងខ្វះស្បៀងអាហារត្រូវការសង្គ្រោះបន្ទាន់ ។
ក្រុមមន្ត្រីការបរទេសទាំងនោះបានបញ្ជាក់ថា ការជួបប្រជុំរបស់ខ្លួននៅពេលនេះគឺផ្តោតទៅលើការបញ្ចុះបញ្ចូលឲ្យភាគីពាក់ព័ន្ធទាំងអស់នៅក្នុងជម្លោះប្រទេសស៊ីរីឲ្យវិលត្រឡប់ទៅរកតុចរចាដែលមានអង្គការសហប្រជាជាតិ ធ្វើជាអាជ្ញាកណ្តាល នៅក្នុងប្រទេសស្វីស សប្តាហ៍ខាងមុខ ៕ ប្រែសម្រួល៖ ថាច់ យ៉ាត
