អន្តរជាតិ៖ បើតាមទីភ្នាក់ងារសារព័ត៌មាន CGTN នៅព្រឹកថ្ងៃចន្ទ ទី១០ ខែឧសភា ឆ្នាំ២០២១ បានដកស្រង់ចេញផ្សាយពីមន្រ្តីប៉ូលីសនាយកដ្ឋានប៉ូលិសទីក្រុង Colorado Springs (CSPD) សហរដ្ឋអាមេរិក បានរាយការណ៍ថា មានករណីជនសង្ស័យម្នាក់ នៅព្រឹកថ្ងៃអាទិត្យ (ពេលវេលានៅអាមេរិក) បានបើកការបាញ់ប្រហារនៅឯពិធីខួបកំណើតមួយក្នុងទីក្រុង ខូឡូរ៉ាដូ ស្ព្រីងស៍ (Colorado Springs) នៃរដ្ឋ ខូឡូរ៉ាដូ (Colorado) ភាគកណ្តាលសហរដ្ឋអាមេរិក ដោយបានបាញ់សម្លាប់មនុស្សចំនួន ០៦នាក់ និងបាញ់សម្លាប់ខ្លួនឯងតាមក្រោយ នៅនឹងកន្លែងកើតហេតុតែម្ដង។
ជាក់ស្ដែងនៅក្នុងសេចក្តីថ្លែងការណ៍របស់នាយកដ្ឋានប៉ូលីសទីក្រុង Colorado Springs (CSPD) បានគូសបញ្ជាក់ថា ប៉ូលីសបានឆ្លើយតបទៅនឹងការហៅទូរស័ព្ទ ដែលរាយការណ៍អំពីការបាញ់ប្រហារមួយនៅឯតំបន់ ខេនធើប៊ឺរី (Canterbury) កាលពីវេលាម៉ោងប្រហែល ១២៖១៨ នាទីពាក់កណ្ដាលអធ្រាត្រ (ម៉ោងក្នុងតំបន់) ឈានចូលថ្ងៃអាទិត្យ។
បន្ថែមពីនេះ នាយកដ្ឋានប៉ូលីស បានបន្ថែមទៀតថា «នៅពេលមកដល់ មន្រ្តីប៉ូលីសបានរកឃើញមនុស្សស្លាប់ចំនួន ០៦នាក់ និងបុរសពេញវ័យម្នាក់ដែលមានរបួសធ្ងន់ធ្ងរ ត្រូវបានបញ្ជូនទៅកាន់មន្ទីរពេទ្យក្នុងតំបន់ ប៉ុន្តែរូបគេបានស្លាប់ដោយសាររបួសធ្ងន់ធ្ងរពេក»។
ដោយឡែកជុំវិញករណីនេះដែរ បើតាមមន្ត្រីប៉ូលីសអាមេរិកម្នាក់ បានអះអាងថា ខ្មាន់កាំភ្លើងម្នាក់ ដែលបានបង្កការបាញ់ប្រហារ រួចសម្លាប់ខ្លួនឯងជាក្រោយនោះ គឺជាមិត្តប្រុសរបស់ស្ត្រីជាជនរងគ្រោះម្នាក់ ដែលស្ថិតក្នុងចំណោមអ្នកស្លាប់ទាំង ០៦នាក់នេះ។
គួរបញ្ជាក់ថា ក្រោយការបាញ់ប្រហាររួច កម្លាំងប៉ូលីសកំពុងបេីកការស៊ើបអង្កេតបន្ត ចំពោះអំពើបាញ់ប្រហារដ៏កក្រើកមួយនេះ៕ដោយ៖ស តារា
