កាលពីថ្ងៃទី២៣ ខែមីនា គណៈកម្មធិការសហគមន៍អឺរ៉ុប បានផ្ញើលិខិតទៅកាន់តំណាងក្រុមហ៊ុន ដឹកជញ្ជូនតាមដែនសមុទ្ររបស់អ៊ីរ៉ង់ ដោយប្រកាសពីគម្រោងបញ្ជូន ក្រុមហ៊ុន ដឹកជញ្ជូនចំនួន៤០របស់អ៊ីរ៉ង់ ទៅក្នុងបញ្ជីដាក់ទណ្ឌកម្មសេដ្ឋកិច្ច ។
ក្នុងចំណោមក្រុមហ៊ុនខាងលើ មានទាំងក្រុមហ៊ុន Ocean Capital Administration GmbH.មានទីតាំងនៅទីក្រុង Hamburg ប្រទេសអាល្លឺម៉ងទៀតផង ដែលត្រូវទទួលរងនៅការដាក់ ទណ្ឌកម្ម របស់សហគមន៍អឺរ៉ុប ដោយសារតែជាប់ពាក់ព័ន្ធនឹងក្រុមហ៊ុនដឹកជញ្ជូនរបស់ ប្រទេសសាធារណរដ្ឋអ៊ិស្លាមអ៊ីរ៉ង់ ។
នៅក្នុងសារលិខិតខាងលើ អឺរ៉ុបបានបញ្ជាក់ថា បណ្តាក្រុមហ៊ុនទាំងនោះ និងបញ្ជូនទៅក្នុងបញ្ចីដាក់ទណ្ឌកម្មជាថ្មី ។
ឆ្លើយតបទៅនឹងសកម្មភាពខាងលើ មេធាវីភាគីអ៊ីរ៉ង់បញ្ជាក់ថា សកម្មភាពរបស់អឺរ៉ុប មានលក្ខណនយោបាយដោយមិនបានប្រើប្រាស់ភស្តុតាងច្បាស់លាស់ណាមួយនោះឡើយ។ មេធាវីអ៊ីរ៉ងបញ្ជាក់ទៀតថា គោលដៅរបស់អឺរ៉ុប ដើម្បីដាក់គំនៀបទៅលើរដ្ឋាភិបាល អ៊ីរ៉ង់ដើម្បីឈានដល់កិច្ចព្រមព្រៀងស្តីពីកម្មវិធីបរមាណូ ។
នៅក្នុងព្រឹត្តិការណ៍មួយផ្សេងទៀត ពាកព័ន្ធនោះដែរ កិច្ចព្រមព្រៀង ស្តីពីនុយក្លេអ៊ែរអ៊ីរ៉ង់ដែលក្រុមចរចា៥ភាគីបូក១ គ្រោងអនុម័តឲ្យបាននៅមុនថ្ងៃទី៣១ មីនាខាងមុខ គឺជាកិច្ច ព្រមព្រៀងនយោបាយមួយដែលអ៊ីរ៉ង់ចេញមុខធានានៅចំពោះមុខ សហគមន៍អន្តរជាតិ ពីតម្លាភាពនៅក្នុងកម្មវិធីនុយក្លេអ៊ែររបស់ខ្លួន ពិសេសមិនផលិតគ្រាប់បែកបរមាណូ។ ជាថ្នូរត្រឡប់វិញ សហគមន៍អន្តរជាតិយល់ព្រមលើកទណ្ឌកម្មទាំងអស់ចេញពីអ៊ីរ៉ង់ ។ លោកប្រមុខការទូតអាមេរិក ចន ឃ៊ែរី បានថ្លែងនៅក្រោយជំនួបជាមួយសមភាគីអ៊ីរ៉ង់ លោកម៉ូហាម៉ាត យ៉ាវ៉ា ហ្ស៉ារីហ្វថា កិច្ចចរចាបានផ្តោតលើប្រធានបទពិបាកៗជាច្រើន តែមានការរីកចម្រើនគួរឲ្យកត់សម្គាល់។ រីឯសមភាគីអ៊ីរ៉ង់ លោកហ្ស៉ារីហ្វ ក៏បានយល់ឃើញដូចលោកឃ៊ែរីដែរ តែបានអះអាងថា នៅមានការងារជាច្រើនទៀតដែលត្រូវធ្វើ ។
យោងតាមប្រមុខការទូតអ៊ីរ៉ង់ដដែល កិច្ចចរចា ៥ភាគីបូក១បានឈានចូលដល់ដំណាក់កាលមួយពិបាក និងដែលគេត្រូវនិយាយត្រង់ទៅត្រង់មកដោយតម្លាភាព និងស្មើភាពគ្នា។ ទន្ទឹមគ្នានេះ លោកហ្ស៉ារីហ្វបានបង្ហើបឲ្យដឹងថា មានសញ្ញាវិជ្ជមានជាច្រើនកំពុងលេចឡើងនៅក្នុងកិច្ចចរចាពេលនេះ និងថាក្រុមអ្នកចរចាអ៊ីរ៉ង់នឹងបន្តស្ថិតក្នុងទីក្រុងឡូសានដោយគ្មានកំណត់ថ្ងៃ ដើម្បីសម្រេចឲ្យបាននូវកិច្ចព្រមព្រៀងនយោបាយមួយស្តីពី សំណុំរឿងនុយ ក្លេអ៊ែរអ៊ីរ៉ង់ដ៏ចម្រូងចម្រាស។ ក៏ប៉ុន្តែសុទិដ្ឋិនិយមរបស់អ៊ីរ៉ង់ និងអាមេរិកពេលនេះ មិនមែនជាការយល់ឃើញរបស់ភាគីចរចាអឺរ៉ុបទេ ។
មន្ត្រីការទូតអឺរ៉ុបម្នាក់បានឆ្លើយនៅមុខក្រុមអ្នកកាសែតថា កិច្ចព្រមព្រៀងនយោបាយមួយស្តីពីរឿងនុយក្លេអ៊ែរអ៊ីរ៉ង់ ស្ថិតនៅឆ្ងាយសែនឆ្ងាយ និងថាលោកគ្មានជំនឿបន្តិចណាសោះថា គេអាចរកឃើញកិច្ចព្រមព្រៀងនៅក្នុងសប្តាហ៍នេះ។ មន្ត្រីការទូតអឺរ៉ុបដដែលថែមទាំងបាននិយាយចំអកថា អ៊ីរ៉ង់បានប្តូរជំហរជារៀងរាល់ថ្ងៃ ម្តងបោះជំហានទៅមុខ ម្តងបោះថយក្រោយវិញ ៕
