ខេត្តកណ្ដាល ៖ បុរសម្នាក់ត្រូវសមត្ថកិច្ចឃាត់ខ្លួន ដោយសារតែរូបគេបានយកដាវសាម៉ូរ៉ៃ ដើរកាប់គេឯងពេញភូមិ បង្កការភ្ញាក់ផ្អើលកាលពីវេលាម៉ោង១១ និង៣០នាទីយប់ ថ្ងៃទី១៧ ខែកក្កដា ឆ្នាំ២០១៥ នៅចំណុចភូមិតាខ្មៅ សង្កាត់តាខ្មៅ ក្រុងតាខ្មៅ ខេត្តកណ្ដាល។
ប្រភពព័ត៌មានពីសមត្ថកិច្ចបានឲ្យដឹងថា បុរសដែលត្រូវសមត្ថកិច្ចឃាត់ខ្លួន ឈ្មោះ លុយ ដារី ភេទប្រុស អាយុ២៨ឆ្នាំ មានទីលំនៅក្នុងភូមិ-ឃុំកើតហេតុ មានមុខរបរមិនពិតប្រាកដ។
តាមប្រជាពលរដ្ឋដែលបានឃើញហេតុការណ៍បានឲ្យដឹងថា មុនពេលកើតហេតុ បុរសខាងលើបានសុំលុយម្តាយរបស់ខ្លួន១ម៉ឺនរៀល ប៉ុន្តែម្តាយមិនឲ្យ ទើបធ្វើឲ្យគេខឹងសម្បារក៏បានស្រែកឡូឡា ផ្អើលអ្នកជិតខាង។ បន្ទាប់មកបុរសនោះបានយកដាវមក កាន់គំរាមកំហែងប្រុងដេញកាប់ លើអ្នកដទៃដែលនៅក្នុងភូមិទៀតផង ។ ក្រោយមកហាក់មានស្មារតីស្វាងបន្តិច រូបគេក៏បានយកដាវទៅលាក់ទុកក្នុងផ្ទះ ទើបសមត្ថកិច្ចបានចុះអន្តរាគមន៍ឃាត់ខ្លួនជនល្មើស រួមទាំងវត្ថុតាងរួចបញ្ជូន មកអធិការដ្ឋាននគរបាលក្រុងតាខ្មៅតែម្តង។
ប្រភពពីសមត្ថកិច្ចបានបញ្ជាក់ថា ក្រោយពីឃាត់ខ្លួនបុរសខាងលើ សមត្ថកិច្ចបានដកហូតដាវសាំម៉ូរ៉ៃ ២ដើម ដែកកេះ២ ឧបករណ៍សំរាប់ប្រើប្រាស់សារធាតុញៀនមួយចំនួន ដែលសង្ស័យថា បុរសខាងលើបែកថ្នាំ ទើបបាត់ស្មារតីវង្វេងវង្វាន់បែបនេះ៕
