ភ្នំពេញ៖ បើយោងតាមការលើកឡើងរបស់ទីប្រឹក្សាគណៈកម្មាធិការជាតិគ្រប់គ្រងគ្រោះមហន្តរាយលោក កែវ វី បានថ្លែងឱ្យដឹងនៅថ្ងៃទី៨ ខែកក្កដា ឆ្នាំ២០២១នេះថា៖ ផ្ទះតូចធំប្រមាណជា ៥ពាន់ខ្នងបានរងការខូចខាត ខណៈមនុស្សប្រមាណជា ១៦០បានស្លាប់ និងរបួសដោយសារបាតុភូតផ្គររន្ទះ និងខ្យល់កន្ត្រាក់រយៈពេល៦ខែដើមឆ្នាំ២០២១នេះ។ ហើយបាតុភូតនេះដែរ បន្តកើតមានរហូតដល់សប្តាហ៍ទី៣ នៃខែកក្កដា ទើបថមថយទៅវិញ បន្ទាប់ពីមានភ្លៀងធ្លាក់ជោគជាំ។
ទីប្រឹក្សាគណៈកម្មាធិការជាតិគ្រប់គ្រងគ្រោះមហន្តរាយរូបនេះ បានបញ្ជាក់បន្ថែមថា៖ ក្នុងរយៈពេល៦ខែ ដើមឆ្នាំ២០២១នេះ បាតុភូខ្យល់កន្ត្រាក់បានកើតមានឡើងនៅទូទាំងប្រទេសចំនួន ១៣៨ លើក បណ្តាលឱ្យរលំខូចធ្ងន់ធ្ងរផ្ទះតូចធំចំនួនប្រមាណជា៦០០ខ្នង របើកដំបូល ជញ្ជាំង (ខូចមធ្យម) ចំនួន៤.៥៦៥ខ្នង អគារសាលារៀន៣១ និងអគារផ្សេងៗចំនួន ១៧។
បន្ថែមពីនេះ លោក កែវ វី បានសង្កត់ធ្ងន់ថា៖ បាតុភូតខាងលើនេះដែរ បណ្តាលឱ្យស្លាប់មនុស្សចំនួន ៥នាក់ និងរបួស៥៦នាក់។ ដោយឡែកចំពោះបាតុភូតរន្ទះបាញ់វិញ ក៏បានសម្លាប់មនុស្សចំនួន៥៩នាក់ និងរបួស៤៤នាក់ ចំណែកសត្វពាហនៈចំនួន៣២ក្បាលបានងាប់ និងខូចផ្ទះសម្បែង៥ខ្នង។ បាតុភូតធម្មជាតិខាងលើកើតមានច្រើននៅក្នុងខែមិថុនា ។
ជុំវិញករណីនេះដែរ អ្នកនាំពាក្យ និងជារដ្ឋលេខាធិការក្រសួងធនធានទឹក និងឧតុនិយម លោកចាន់ យុត្ថា បានថ្លែងឱ្យដឹងនៅថ្ងៃនេះដែរថា៖ បាតុភូតផ្ទះរន្ទះ និងខ្យល់កន្ត្រាក់ (Thanderstrom) នៅបន្តកើតមានទៀត សូមប្រុងប្រយ័ត្ន ដោយសារសីតុណ្ហភាពអតិបរមា នៅមានកម្រិតខ្ពស់ជាមួយប្រព័ន្ធសម្ពាធទាប (ITCZ) កើតមិនទាន់ជាប់លាប់។
គួរបញ្ជាក់ថា នៅសប្តាហ៍ទីបីនៃខែកក្កដានេះ បាតុភូតផ្គររន្ទះ និងខ្យល់កន្ត្រាក់នឹងអាចថមថយទៅវិញ បន្ទាប់ពីមានភ្លៀងធ្លាក់ជោគជាំ៕ដោយ៖សហការី
រូបភាព៖ឯកសារ
