ខេត្តស្វាយរៀង៖ មានករណីគ្រោះថ្នាក់ចរាចរណ៍ទាំងព្រឹកបង្កឡើងដោយរថយន្តម៉ាកសាំយ៉ុងបើកឆ្លងកាត់ផ្លូវអាទិភាពខ្វះការប្រុងប្រយ័ត្នបានទៅបុកជាមួយរថយន្តម៉ាកហុីយ៉ាន់ដាយដឹកដីយ៉ាងពេញទំហឹងបណ្ដាលឱ្យបុរសម្នាក់រងរបួស ចំណែករថយន្តខូចខាតទាំងសងខាង។ ហេតុការណ៍នេះបានកើតឡើងកាលពីវេលាម៉ោង៥និង៣០នាទីព្រឹកថ្ងៃទី១១ខែកក្កដាឆ្នាំ២០២១លើផ្លូវជាតិលេខ១៣ក្រាលកៅស៊ូ
ស្ថិតនៅត្រង់ចំណុភូមិថ្នល់ពាម ឃុំអង្គប្រស្រែ ស្រុករមាសហែក ខេត្តស្វាយរៀង។

យោងតាមសមត្ថកិច្ចនគរបាលស្រុកបានឱ្យដឹងថា អ្នកបើករថយន្តបង្កហេតុមានឈ្មោះភោគ សុខា អាយុ៣៧ឆ្នាំ  និងអ្នករួមដំណើរមានឈ្មោះឯម សាវ៉ាត ភេទប្រុស អាយុ៣៨ឆ្នាំ រស់ភូមិដូង ឃុំដូង ស្រុករមាសហែក ខេត្តស្វាយរៀង។ ចំណែកភាគីរថយន្តម៉ាកហុីយ៉ាន់ដាយដឹកដីមានឈ្មោះហឿង ឧត្តម ភេទប្រុសអាយុ២០ឆ្នាំ មុខរបរបើកបរ រស់នៅភូមិបឹងកែក ឃុំដូនស ស្រុកស្វាយជ្រំ ខេត្តស្វាយរៀង មិនមានរងរបួសនោះទេ។

ប្រភពបន្តថា មុនកើតហេតុមានរថយន្តមួយគ្រឿងម៉ាកសាំយ៉ុង ដឹកទំនិញពណ៌សំបកឪឡឹក ពាក់ស្លាកលេខភ្នំពេញ២E​-៧០០៨ បើកបរពីទិសខាងកើតទៅទិសខាងលិចលើផ្លូវជាតិលេខ១៣ ក្រាលកៅស៊ូដោយឆ្លងកាត់ផ្លូវអាទិភាពខ្វះការប្រុងប្រយ័ត្នស្រាប់តែទៅបុកជាមួយ រថយន្តម៉ាកហុីយ៉ាន់ដាយដឹកដីពណ៌សពាក់ស្លាកលេខកំពង់ចាម៣B- ០១៣៣ក្នុងទិសដៅពីត្បូងទៅជើងយ៉ាងពេញទំហឹងលាន់សូរដូចរន្ទះបង្កការភ្ញាក់ផ្អើលតែម្ដង។ ក្រោយកើតហេតុសមត្ថកិច្ចបានមកដល់ធ្វើការវាស់វែងនិងដឹកជនរងគ្រោះឈ្មោះឯម សាវ៉ាត ទៅព្យាបាលនៅមណ្ឌលសុខភាពដូង ស្រុករមាសហែកនិងអូសយកមករថយន្តទាំង២គ្រឿងទៅរក្សាទុកនៅអធិការដ្ឋាននគរបាលស្រុករមាសហែកដើម្បីដោះស្រាយនៅពេលក្រោយតាមច្បាប់៕ យឹម សុថាន